Bakı, 23 sentyabr (AZƏRTAC). TAP-ın idarəçiləri (Transadriatik boru xətti) həm “Nabukko”nun, həm də Türkiyə-Yunanıstan-İtaliya layihəsinin (ITGI) ortağı olan Türkiyəni öz tərəfinə çəkmək üçün cəhdlərini davam etdirir.

AZƏRTAC Türkiyənin “Hürriyet” qəzetinə istinadla xəbər verir ki, Türkiyə, Yunanıstan və Albaniya ərazisindən İtaliyaya uzanacaq xətlə Azərbaycan qazını Avropaya daşımağı hədəfləyən TAP-da son dövrdə fərqli yollar üzərində çalışdıqlarını deyən layihə üzrə Beynəlxalq münasibətlər və xarici əlaqələr şöbəsinin direktoru Michael Hoffman hazırda bir Balkan layihəsi yaratmaq istiqamətində işlədiklərini qeyd etmişdir. Onun sözlərinə görə, BOTAŞ bu layihədə iştirak etməklə Balkan bölgəsində fəal oyunçu ola bilər.

Nəhəng bir boru xətti tikməyə niyyətləri olmadığını ifadə edən M.Hoffman bildirmişdir ki, məncə bu dövrdə böyük layihələrin həyata keçirilməsi çox da real deyil. Biz Türkiyədəki mövcud BOTAŞ xətlərindən istifadə etmək istəyirik. Bu xəttə yeni əlaqələr əlavə oluna bilər. BOTAŞ-ın mövcud sistemini yeniləmənin təxminən 2 milyard dollarlıq xərci olduğuna işarə edən M.Hoffman ehtiyac duyulacağı təqdirdə burada da iştirak edə biləcəklərini söyləmişdir.

Türkiyənin önəmli bir tranzit ölkəsi olduğunu vurğulayan rəsmi nümayəndə bu ölkənin enerji mərkəzi olmaq istədiyinə də diqqət çəkmişdir. Avropanın etibarlı bir enerji tərəfdaşı, “Şahdəniz” konsorsiumunun isə qazın dünya bazarlarına nəqlinə zəmanət istədiyini söyləyən Hoffman qeyd etmişdir ki, biz “Şahdəniz”in meyarlarının hamısını qarşılayırıq.

Burada əsas məsələ “Şahdəniz” qazı üçün ən yaxşı təklifə sahib olmaqdır. “Nabukko” 31 milyard kubmetr, ITGI 8-12 milyard kubmetr, biz isə 10-20 milyard kubmetr təbii qaz daşımağı hədəfləyirik. “Şahdəniz” yatağında 2017-ci ildən etibarən daşına biləcək qazın miqdarı isə 16 milyard kubmetrdir. Buradan da görünür ki, TAP və ITGI “Şahdəniz”dən ilkin mərhələdə çıxarılacaq qaz həcminə uyğun layihələrdir. Bununla yanaşı, “Nabukko” layihəsi də pis fikir deyil, ancaq o, yaxın on ilin layihəsi deyil.

Qeyd edək ki, Xəzər dənizindəki qazı Avropaya daşımaq üçün 3 boru xətti arasında böyük bir rəqabət yaşanır. Oktyabrın 1-nə hər üç layihə son tariflərini “Şahdəniz” konsorsiumunun tərəfdaşlarına bildirməlidirlər.