Tarix Muzeyinin incilərindən - qızıl çərçivəli möhür
Bakı, 10 dekabr, AZƏRTAC
Milli Azərbaycan Tarixi Muzeyində üzərində insan və cəng arabası təsvir olunan qızıl çərçivəli möhür qorunur.
Bu barədə AZƏRTAC-a muzeydən məlumat verilib. Bildirilib ki, ölkəmizdə aparılan arxeoloji qazıntılar zamanı tapıntıların əksər hissəsi muzeyin Xüsusi fondunda saxlanılır. Mil düzündəki kurqanlar silsiləsi, xüsusən də Üçtəpə dərəsindəki Böyük kurqan ilk dəfə elmi ictimaiyyətə 1956-1960-cı illərdə məlum olub. Qəbirdə olan maddi mədəniyyət nümunələrinin VII əsrin I yarısına aid olduğu müəyyən edilib.
Alimlərin qənaətinə görə, qəbir yerli sakinə - Qafqaz Albaniyası qoşunlarının tərkibində olan döyüşçüyə məxsusdur. Qəbirdə 20-30 yaşlı kişi döyüşçünün - skeletin boynunda qızıldan çərçivəsi olan əqiq möhür də asılıb. Möhürün çənə sümüyü altında tapılması və çərçivəsində məftil ilgəyin olması onun boyundan iplə asıldığını deməyə əsas verir. Qızıl çərçivəli olan əqiq möhür ellips formalıdır, üzərində insan və cəng arabası təsvir olunub.
Möhürdə olan at arabasında döyüşçü təsviri antik dövrlərə xasdır. Ehtimal olunur ki, bu möhür artıq IV əsrdən məlum olan hakimiyyət rəmzi kimi istifadə olunub. Qızıl çərçivəli möhür döymə, əymə, lehimləmə, yonma və daş bərkitmə texnikası ilə işlənilib.
Bölmənin digər xəbərləri
