Tiranada Qara Dəniz İqtisadi Əməkdaşlıq Təşkilatı Parlament Məclisinin iqtisadiyyat, ticarət, texnologiya və ekologiya məsələləri üzrə komitəsinin 42-ci iclası keçiriləcəkdir
Bakı, 7 mart (AZƏRTAC). Azərbaycan Respublikası Milli Məclisinin sosial siyasət komitəsinin sədr müavini, Qara Dəniz İqtisadi Əməkdaşlıq Təşkilatı Parlament Məclisinin iqtisadiyyat, ticarət, texnologiya və ekologiya məsələləri üzrə komitəsinin sədri Musa Quliyev qurumun 42-ci iclasında iştirak etmək üçün martın 10-da Albaniyanın Tirana şəhərinə yola düşəcəkdir.
Milli Məclisin mətbuat xidmətindən AZƏRTAC-a bildirmişlər ki, tədbirdə “Qara Dəniz İqtisadi Əməkdaşlıq Təşkilatına üzv ölkələrin müasir tikinti və arxitekturasında yeni texnologiyaların tətbiqi” mövzusunda məruzə dinləniləcək, müzakirələr aparılacaqdır.
Səfər martın 12-də başa çatacaqdır.
Həmçinin martın 11-də Sankt-Peterburqda Müstəqil Dövlətlər Birliyi Parlament Assambleyasının mədəniyyət, informasiya, turizm və idman məsələləri üzrə daimi komissiyasının iclası keçiriləcəkdir.
Tədbirdə Milli Məclisin deputatı Rauf Əliyev iştirak edəcəkdir.
İclasda elektron hökumət, turist fəaliyyəti, könüllülük fəaliyyəti, təhsil sistemində informasiya-kommunikasiya texnologiyalarının tətbiqi haqqında və digər model qanun layihələri, həmçinin bir sıra təşkilati məsələlər müzakirə olunacaqdır.
Tədbir çərçivəsində martın 12-də Rusiya Federal Məclisinin Federal Şurası ilə birlikdə “Mədəni-tarixi və mənəvi dəyərlərin əsaslarının formalaşması” mövzusunda “dəyirmi masa” da keçiriləcəkdir.
Bölmənin digər xəbərləri
