TORONTODA ULU ÖNDƏRİN YUBİLEYİNƏ HƏSR OLUNMUŞ MUSİQİ GECƏSİ KEÇİRİLMİŞDİR
Azərbaycan Respublikasının Kanadadakı səfirliyindən AZƏRTAC-a bildirmişlər ki, Heydər Əliyevin 85 illik yubileyi münasibətilə Toronto şəhərindəki Ontario Elm Mərkəzində “Toronto İpək Yolu Kamera Musiqisi Orkestri”nin və “Təbriz” rəqs qrupunun ifasında Azərbaycan klassik musiqisi və rəqslərindən ibarət musiqi gecəsi keçirilmişdir.
Kanada parlamentinin, diplomatik korpusun, Azərbaycan və türk icmalarının nümayəndələrinin iştirak etdiyi yubiley gecəsi səfirlik, Niaqara Beynəlxalq Kamera Musiqisi Festivalı və Xarici Ölkələrdə Yaşayan Azərbaycanlılarla iş üzrə Dövlət Komitəsinin dəstəyi ilə təşkil olunmuşdur.
Hər iki ölkənin dövlət himnlərinin səsləndirilməsi ilə başlanan mərasimdə müvəqqəti işlər vəkil F.Şəfiyev, Kanada parlamentinin üzvü, Kanada-Azərbaycan parlamentlərarası dostluq qrupunun sədri Yasmin Ratansi və Niaqara Beynəlxalq Kamera Musiqisi Festivalının bədii direktoru Atis Bankas çıxış etmişlər.
Həmyerlimiz, dirijor və bəstəkar İsmayıl Hacıyev tərəfindən hazırlanmış konsertin proqramına Üzeyir Hacıbəyovun, Qara Qarayevin, Fikrət Əmirovun, Cövdət Hacıyevin və digər bəstəkarların əsərləri, Azərbaycan xalq musiqisi və rəqsləri salınmışdı.
######
Bölmənin digər xəbərləri
