Bakı, 3 oktyabr, AZƏRTAC

Oktyabrın 3-də “Birləşmiş Millətlər Təşkilatının (BMT) Uşaq Hüquqları Komitəsinin (CRC) və BMT-nin Qadınlara qarşı ayrı-seçkiliyin ləğv edilməsi üzrə Komitəsinin (CEDAW) Azərbaycan Respublikasının sonuncu dövri hesabatları ilə bağlı tövsiyələrinin yerinə yetirilməsində vətəndaş cəmiyyəti institutlarının rolu” mövzusunda konfrans keçirilib.

AZƏRTAC xəbər verir ki, konfransda çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova bildirib: “Biz BMT-nin “Qadınlara qarşı ayrı-seçkiliyin bütün növ formalarının ləğv edilməsi haqqında” Konvensiyasını ratifikasiya etmişik. Bu sahədə ciddi irəliləyişlər var. Komitənin zorakılıqdan əziyyət çəkən qadınlar üçün pulsuz hüquqi yardımın göstərilməsi ilə bağlı öz yaşanması var. Bu istiqamətdə aidiyyəti qurumlarla danışıqlar aparılıb”.

O qeyd edib ki, bu məsələnin köklü həlli qadınları pulsuz hüquqi yardımın göstərilməsi məsələsinin qanunvericiliklə tənzimlənməsindən asılıdır.

Digər çıxış edənlər - Ailə, Qadın və Uşaq Problemləri üzrə Dövlət Komitəsinin aparat rəhbəri Ceyran Rəhmətullayeva, Hüquqi təminat şöbəsinin müdiri Taliya İbrahimova, Qeyri-Hökumət Təşkilatlarına Dövlət Dəstəyi Agentliyinin İcraçı direktoru Aygün Əliyeva, Dövlət Komitəsi sədrinin müavinləri Aynur Sofiyeva və Sədaqət Qəhrəmanova, həmçinin “Rasional inkişaf uğrunda” Qadın Cəmiyyətinin rəhbəri Şəhla İsmayılova konfransda Azərbaycanın sonuncu dövri hesabatları ilə bağlı BMT-nin müvafiq komitələrinin tövsiyələrinin yerinə yetirilməsində qeyri-hökumət təşkilatlarının əhəmiyyəti, görülmüş işlər, qarşılaşılan problemlər və gələcəkdə nəzərdə tutulan tədbirlər barədə fikirlərini bildirib, müzakirələr aparıblar.

Dövlət qulluğunda çalışan işçilərin gender məsələləri üzrə təcrübələrini yaxşılaşdırmaq üçün qadın hüquqları üzrə xüsusi təlimin təşkil edilməsinin zəruriliyi vurğulanıb. Həmçinin sosial təhlükəli vəziyyətdə olan kimsəsiz uşaqlar üçün reabilitasiya mərkəzinin yaradılmasının önəmi qeyd olunub. Ədliyyə, polis və digər hüquq-mühafizə orqanları arasında gender stereotiplərinin aradan qaldırılması üçün hüquqi maarifləndirmə kampaniyalarının aparılmasının vacibliyi diqqətə çatdırılıb.

Eyni zamanda, qadınlar və qızlar, o cümlədən kənd yerlərində və məcburi köçkün, əlilliyi olan və yaşlı qadınlar arasında hüquqlarının pozulmasına dair məlumatlılığın artırılmasının genişləndirilməsi barədə fikir mübadiləsi aparılıb.

Bütün qadınlara, xüsusən də məişət zorakılığı qurbanlarına pulsuz hüquqi yardımın təmin edilməsinin önəmi vurğulanıb.

Sonda QHT-lər mövzu ilə bağlı müxtəlif təkliflər səsləndiriblər.

Qeyd edək ki, konfransda Ailə, Qadın və Uşaq Problemləri üzrə Dövlət Komitəsinin rəhbər heyəti, Dövlət Komitəsi yanında İctimai Şuranın üzvləri, qadın və uşaq hüquqları sahəsində fəaliyyət göstərən 50 qeyri-hökumət təşkilatı və media nümayəndələri iştirak ediblər.