Tunis sahillərində 80-dən çox miqrant itkin düşüb
Bakı, 4 iyul, AZƏRTAC
Göyərtəsində 86 qeyri-leqal miqrantın olduğu gəmi Aralıq dənizinin Tunis sahillərində çevrilərək batıb.
AZƏRTAC verir ki, bu barədə Assosiated Press agentliyi Beynəlxalq Miqrasiya Təşkilatına istinadla məlumat yayıb. Təşkilatın Tunisdəki missiyasının rəhbəri Loren Landonun sözlərinə görə, gəmidəki 82 nəfər indiyədək itkin düşmüş sayılır. Qəzaya uğramış gəmini görən balıqçılar sudan dörd nəfəri çıxara biliblər. Sonradan onlardan biri ölüb, digər üç nəfər xəstəxanaya aparılıb.
Agentlik qeyd edir ki, gəmi Tunisin cənubundakı Zarziz şəhəri yaxınlığında batıb.
Bu ilin mayında Tunis sahillərində Liviyadan Avropaya gedən digər bir miqrant gəmisi qəzaya uğramışdı. O vaxt 65 nəfər həlak olmuşdu.
Bölmənin digər xəbərləri
