Ankara, 9 yanvar, AZƏRTAC

“Emmanuel Makronun prezidentliyi dövründə Fransanın düşdüyü vəziyyət tamamilə acınacaqlıdır. Fransa lideri Birləşmiş Millətlər Təşkilatının Təhlükəsizlik Şurasının (BMT TŞ) daimi üzvlərindən olan ölkəsinin acizliyini və acınacaqlı vəziyyətini dəfələrlə dünya ictimaiyyətinə nümayiş etdirib”.

Bu fikri AZƏRTAC-a açıqlamasında “İMZA” Sosial İnkişafa Dəstək İctimai Birliyinin Türkiyədəki nümayəndəsi, bu ölkənin Azərbaycandakı keçmiş səfiri Hulusi Kılıç bildirib.

Onun sözlərinə görə, buna daha bir sübut Fransa liderinin yanvarın 6-da Parisdə səfirlərin illik konfransında Azərbaycana qarşı səsləndirdiyi ittihamlar olub.

Sabiq səfir Makronun Azərbaycanın Fransanın müstəmləkələrində yaşayan sakinlərin azadlıq və müstəqillik arzularına dəstək verməsi ilə bağlı şikayətlərinə, eləcə də onun rəsmi Parisin açıq-aşkar ermənipərəst kursuna haqq qazandırmaq cəhdlərinə diqqət çəkib.

“Müasir Azərbaycan Türk dünyasının hər bir nümayəndəsi üçün qürur mənbəyidir. Bu, öz gücü ilə suverenliyini və ərazi bütövlüyünü bərpa edən, BMT Təhlükəsizlik Şurasının 4 qətnaməsinin müddəalarını yerinə yetirən, tarixi ədaləti təmin edən, ATƏT-in Minsk qrupu adlı mənasız struktura son qoyan qalib ölkədir. Azərbaycanın artan gücü Bakının opponentləri, o cümlədən Fransa üçün narahatlıq mənbəyidir”, - deyə diplomat bildirib.

“İMZA” birliyinin nümayəndəsi noyabr ayında Azərbaycanda keçirilən və yüksək təşkilatçılığı ilə yadda qalan COP29 iqlim sammiti fonunda Parisin intriqalarını xatırladıb.

Kılıç Emmanuel Makronun ölkəsinin Ermənistanı dəstəkləməsinin beynəlxalq hüquqa əsaslanması ilə bağlı iddialarını absurd adlandırıb. “Əgər Paris həqiqətən beynəlxalq hüququ qorumağa çalışırsa, o zaman Bakının BMT Təhlükəsizlik Şurasının qətnamələrinin təmin edilməsi üzrə atdığı addımları Fransa lideri niyə qəbul etmək istəmir? Paris Azərbaycanla Ermənistan arasında sülh danışıqlarının qarşısını niyə əngəlləyir? Fransa xarici ərazilərində yaşayan sakinlərin ümumi qəbul olunan insan hüquqlarını niyə pozur?”, - deyə Türkiyənin keçmiş səfiri bildirib.

O qeyd edib ki, Fransa hakimiyyəti Azərbaycana hücum etmək əvəzinə, öz siyasətini təhlil edib yenidən nəzərdən keçirməlidir. “Paris kirli əllərini Cənubi Qafqazdan uzaq tutmalıdır ki, bununla da o regionda sülhün və sabitliyin təmin olunmasına ən böyük töhfəni vermiş olacaq. Əminəm ki, Ermənistan, Azərbaycan və Türkiyə qonşu ölkələr kimi regiondankənar güclərin iştirakı olmadan dialoq yolu ilə fikir ayrılıqlarını həll edə biləcəklər”, - deyə Kılıç vurğulayıb.

O əlavə edib ki, Paris öz hərəkətləri ilə, o cümlədən silah tədarükü ilə Ermənistanın və erməni xalqının maraqlarına yalnız zərər verir.

Ramin Abdullayev

AZƏRTAC-ın xüsusi müxbiri

Ankara