Üç ayda 193-Çağrı mərkəzinə 4 mindən çox müraciət daxil olub
Bakı, 4 aprel, AZƏRTAC
Cari ilin ilk 3 ayında Əmlak Məsələləri Dövlət Komitəsinin (ƏMDK) Çağrı mərkəzinə 4 mindən çox müraciət daxil olub.
Komitədən AZƏRTAC-a bildirilib ki, 1500-dək müraciət daşınmaz əmlak üzərində mülkiyyət hüquqlarının qeydiyyatı, 750-dək məktub və ərizələrin icrası, 300-dək adına əmlakın olması barədə arayış, 100-dək isə dövlət əmlaklarının özəlləşdirilməsi ilə bağlı olub.
Çağrı mərkəzinə bölgü sxemi, kadastr, dövlət rüsumu və xidmət haqqı, elektron xidmətlər və digər mövzular üzrə müraciətlər də daxil olub.
Yanvar-mart aylarında Çağrı mərkəzinin qəbul etdiyi müraciətlərin 3,8 mindən çoxu sorğu tiplidir. Vətəndaşlar tərəfindən ünvanlanan bütün suallar komitənin əməkdaşları tərəfindən qanunvericiliyə uyğun olaraq cavablandırılıb. Ümumi müraciətlər arasında araşdırma tələb edən müraciətlər də yer alıb. Bu tip müraciətlər qeydiyyata alınıb və müvafiq struktur bölmələrə göndərilib. Struktur bölmələrə daxil olan məsələlərin qanunvericiliyə uyğun həlli təmin edilib.
Əmlak Məsələləri Dövlət Komitəsinin fəaliyyət istiqamətləri ilə bağlı vətəndaşların daha operativ formada informasiya əldə etməsi, sorğuların dərhal cavablandırılması üçün Çağrı mərkəzində yeni və müasir üsullar tətbiq olunur.
193-Çağrı mərkəzi canlı və səsli menyu rejimində olmaqla fasiləsiz fəaliyyət göstərir. Canlı rejim həftənin iş günləri saat 09:00-dan 18:00-dək həyata keçirilir. Səsli menyu rejimi isə iş vaxtından sonrakı vaxtlarda, həftənin qeyri-iş günləri və bayram günlərində fəaliyyət göstərir.
Vətəndaşların daşınmaz əmlakla bağlı müraciətlərinin interaktiv qəbulu Əmlak Məsələləri Dövlət Komitəsinin 193 nömrəli Çağrı mərkəzi vasitəsilə aparılır. Komitənin fəaliyyəti ilə bağlı ünvanlanan bütün müraciətlər mərkəz tərəfindən operativ və əhatəli formada cavablandırılır. Müvafiq qurum və idarələrdə göstərilən xidmətlərin keyfiyyətinin artırılması, şəffaflığın, məmnunluğun təmin edilməsi məqsədilə vətəndaşların rəy və təklifləri də qəbul edilir. Göstərilən bütün xidmətlər barədə vətəndaşlar məlumatlandırılır, prosedurlar geniş formada izah edilir. Bundan başqa, Çağrı mərkəzi hüquqi yardım almaq istəyən vətəndaşların da müraciətlərini qəbul edir.
Bölmənin digər xəbərləri
