UKRAYNA PREZİDENTİ KRIM TATARLARI İLƏ YERLİ HAKİMİYYƏT ORQANLARININ MÜNASİBƏTLƏRİNİ TƏNZİMLƏMƏK NİYYƏTİNDƏDİR
AZƏRTAC-ın Ukrinformdan aldığı xəbərə görə, Ukrayna Prezidenti Viktor Yuşşenko Krım tatarları ilə yerli hakimiyyət orqanları arasında münaqişənin yoluna qoyulması məsələlərini xalq deputatları Rüfət Çubarov və Mustafa Cəmillə müzakirə etmişdir. Söhbət “Milli əlamətə görə deportasiya olunmuş şəxslərin hüquqlarının bərpa edilməsi haqqında” qanunun yeni redaksiyada hazırlanması və qəbulundan gedir. Qanun layihəsinin hazırlanması üçün ümumi işçi qrupu yaratmaq qərara alınmışdır.
Qanuna Krım tatarlarının və hakimiyyət orqanlarının qarşılıqlı öhdəlikləri daxil ediləcək, sənədin hazırlanmasına yarımadanın Krım tatar əhalisinin, mərkəzi hakimiyyət və yerli özünüidarə orqanlarının nümayəndələri cəlb olunacaqlar.
Bundan əlavə, torpaq problemləri və Krım tatarlarının məscidlər tikdirmək imkanları da müzakirə edilmişdir.
Bundan əvvəl bildirilmişdi ki, Krım Muxtar Respublikasının hökuməti ilə Krım tatarları arasında münaqişələr sonuncuların tarixən onlara məxsus torpaqları ələ keçirmələri nəticəsində baş vermişdir.
Bölmənin digər xəbərləri
