Ukraynanın baş naziri Ukrayna hökumətinin Avropa İttifaqı ilə assosiasiya prosesinin dayandırılması haqqında qərarını şərh etmişdir

22.11.2013 [20:05]
Çap et
A⁺ A^-

Kiyev, 22 noyabr (AZƏRTAC). Ukrayna hökumətinin ölkədə yaranmış iqtisadi vəziyyəti nəzərə alaraq Ukrayna ilə Avropa İttifaqı (Aİ) arasında assosiasiya haqqında saziş bağlanmasına hazırlıq prosesinin dayandırılması haqqında qərarı texniki xarakter daşıyır. Buna baxmayaraq, Ukraynanın Avropaya inteqrasiyaya yönəlmiş strateji kursu dəyişməz qalır.

Ukraynanın Baş naziri Nikolay Azarov bu fikri noyabrın 22-də parlamentdə çıxışında səsləndirmişdir.

N.Azarov demişdir: “Ukrayna ilə Avropa İttifaqı arasında assosiasiya haqqında saziş imzalanmasını hələlik dayandırmaq barədə qərar mürəkkəb, lakin Ukraynada yaranmış iqtisadi vəziyyətdə yeganə mümkün qərardır. Bu qərar sırf iqtisadi səbəblərlə bağlıdır və texniki xarakter daşıyır, Ukraynanın daxili və xarici siyasətinin prinsipləri haqqında qanunda təsbit edilmiş strateji inkişaf istiqamətlərini dəyişmir”.

Baş nazir eyni zamanda əminliklə demişdir ki, həm prezident, həm də hökumət Avropaya inteqrasiyaya yönəlmiş islahatlar xəttini davam etdirəcəklər.

Zeynal Ağazadə

AZƏRTAC-ın xüsusi müxbiri

Kiyev