Ukraynanın paytaxtında “Ukraynanın hazırkı reallıqlarında milli azlıqların ən mühüm problemlərinin həlli yolları və onların dövlətin ictimai-siyasi həyatında iştirakı” mövzusunda “dəyirmi masa” keçirilmişdir
Kiyev, 16 aprel (AZƏRTAC). Ukrayna Mili İnformasiya Agentliyinin (Ukrinform) mətbuat mərkəzində “Ukraynanın hazırkı reallıqlarında milli azlıqların ən mühüm problemlərinin həlli yolları və onların dövlətin ictimai-siyasi həyatında iştirakı” mövzusunda “dəyirmi masa” keçirilmişdir.
Tədbiri həmvətənimiz Paşa Məmmədovun (İlisuyski) rəhbərlik etdiyi “Ukraynanın Qafqaz Xalqları Konqresi” təşkil etmişdir.
“Dəyirmi masa”da Qafqaz xalqları diasporlarının nümayəndələri iştirak etmişlər.
Tədbirdə Paşa Məmmədov (İlisuyski) bildirmişdir ki, Ukraynada yaşayan xalqlar Rusiya və Ukrayna arasında münaqişənin həllinə kömək etmək üçün səylərini birləşdirməli və gələcəkdə iki slavyan xalqı arasında düşmənçiliyə imkan verməməlidirlər. O demişdir: “Ukraynada yaşadığımız müddətdə bir dəfə də olsun mili azlıqların hüquqlarının məhdudlaşması ilə qarşılaşmamışıq, buna görə Ukrayna xalqına minnətdarıq. Ukrayna tolerantlıq nümunəsi olmuşdur və indi də belədir. Buna görə də bizim vəzifələrimizdən biri Ukrayna cəmiyyətində bu cür tolerantlıq nümunəsinin gələcəkdə də saxlanması üçün səylərimizi birləşdirməkdir”.
“Ukraynanın Qafqaz Xalqları Konqresi”nin təsisçisi və rəhbəri Qafqaz xalqlarının bütün diasporlarının, ictimai təşkilatlarının nümayəndələrini birliyin fəaliyyətində iştirak etməyə çağırmışdır.
“Dəyirmi masa”da iştirak edən bütün tərəflər həmvətənimizin təkliflərini dəstəkləmişlər.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
