İQTİSADİYYAT
Ulu Öndər Heydər Əliyevin 100 illiyinə həsr olunmuş II Beynəlxalq İnnovasiya Menecmenti və TRİZ konfransı keçirilib










Bakı, 7 dekabr, AZƏRTAC
Milli Aviasiya Akademiyasında (MAA) Ulu Öndər Heydər Əliyevin 100 illiyinə həsr olunmuş II Beynəlxalq İnnovasiya Menecmenti (İMTİ) və TRİZ konfransı keçirilib.
AZƏRTAC xəbər verir ki, Milli Aviasiya Akademiyası, İnnovasiya Menecmenti və TRİZ İnstitutu və Türkiyənin Qazi Universitetinin birgə təşkilatçılığı ilə keçirilən konfransa müxtəlif xarici ölkələrdən 50-dən çox iştirakçı qoşulub.
Konfransı giriş sözü ilə açan MAA-nın Yeni texnologiyalar üzrə prorektoru professor Xəqani Abdullayev konfrans iştirakçılarına Milli Aviasiya Akademiyasının rektoru, akademik Arif Paşayevin salamlarını çatdırıb və konfransın işinə uğurlar arzulayıb.
Konfransda Azərbaycan Respublikasının və Türkiyə Cümhuriyyətinin Dövlət himnləri səsləndirilib, daha sonra tədbir iştirakçıları Azərbaycan və Türkiyənin müstəqilliyi uğrunda həlak olmuş şəhidlərin xatirəsini bir dəqiqəlik sükutla yad ediblər.
Konfrans Qazi Universitetinin rektoru, professor Musa Yıldızın, İnnovasiya Menecmenti və TRİZ İnstitutunun idarə heyətinin sədri professor Ali Kutvanın salamlama nitqləri ilə davam edib.
Tədbirdə TRİZ nəzəriyyəsinin yaradıcısı, əslən bakılı olan tanınmış alim və ixtiraçı, yazıçı-fantast Genrix Altşuller haqqında hazırlanmış sənədli film nümayiş olunub.
Konfransda Genrix Altşuller adına şərəf medalının təsis olunması haqqında məlumat verilib. G.Altşuller adına ilk medal MAA-nın rektoru, akademik Arif Paşayevə təqdim edilib. Növbəti medallar professor Musa Yıldıza, İMTİ İdarə Heyətinin sədri Ali Kutvana, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinə, TRİZ Master, professor Viktor Feyə, G.Altşullerin nəvəsi, Altşuller Fondunun təsisçisi Yuna Komarçevaya, SSRİ Əməkdar ixtiraçısı Fəxrəddin Həbibova və Bakı Avropa Liseyinə təqdim edilib.
Konfransda plenar məruzələrlə TRİZ Master, “GET-TRİZ LLC” şirkətinin rəhbəri Viktor Fey, süni intellekt texnologiyaları üzrə “Alpine Gate AgI” şirkətinin icraçı direktoru Con Qodel, Qazi Universitetinin professoru Çetin Elmas, Azərbaycan Texniki Universitetinin professoru Mehman Həsənov, IMTI-nin icraçı direktoru Natiq Əliyev çıxış edib.
Daha sonra TRİZ QRAN PRİ mükafatının təqdimat mərasimi keçirilib. Daha əvvəl üç dəfə bu mükafatın qalibi ola Bakı Avropa Liseyinin şagirdlərindən ibarət komandası bu dəfə də mükafata layiq görülüb.
Panel sessiyada Rusiya Təbiət Elmləri Akademiyasının həqiqi üzvü, professor Fəxrəddin Həbibov, MAA TRİZ klubunun sədri Səidə Əhmədova, TRİZ ustadları Viktor Fey, Pavel Amnuel (onlayn) və Anton Kulakov (onlayn) çıxış ediblər.
Konfrans işini dekabrın 9-dək davam etdirəcək.