Pekin, 12 dekabr, AZƏRTAC

Azərbaycanın Çin Xalq Respublikasındakı səfirliyində Ulu Öndər Heydər Əliyevin xatirəsi anılıb.

AZƏRTAC xəbər verir ki, əvvəlcə Ulu Öndərin xatirəsi bir dəqiqəlik sükutla yad edilib, səfirlikdəki büstü önünə gül dəstəsi qoyulub.

Çində yaşayan və təhsil alan soydaşlarımızın, “Azərbaycan Hava Yolları” QSC-nin Bakı-Pekin reysinin heyətinin qatıldığı tədbirdə çıxış edən səfir Bünyad Hüseynov bildirib ki, həyatını qüdrətli Azərbaycan dövlətinin yaradılmasına və inkişafına həsr etmiş Heydər Əliyev Azərbaycanı ağır və sərt sınaqlardan çıxararaq, işıqlı sabahın etibarlı bünövrəsini qoyub. Səfir deyib ki, 1991-ci ildə dövlət müstəqilliyini yenicə bərpa edən Azərbaycan Ermənistanın hərbi təcavüzü, daxili çəkişmələr, vətəndaş qarşıdurması, xaos, anarxiya fonunda müstəqilliyini itirmək təhlükəsi ilə üz-üzə idi. Azərbaycan xalqı yaranmış ağır şəraitdən çıxmağın yeganə nicat yolunu Heydər Əliyevdə gördü və təkidlə onu yenidən hakimiyyətin sükanını əlinə almağa çağırdı. Nəticədə, Ulu Öndər Heydər Əliyev xalqının iradəsinə uyğun olaraq Azərbaycanı, tarixi nailiyyət sayılan müstəqilliyimizi xilas etdi.

Ümummilli Liderin müdrikliyi, qətiyyəti, siyasi bacarığı və çoxillik idarəçilik səriştəsi ilə Azərbaycanda ictimai-siyasi, sosial-iqtisadi, elmi və mədəni həyatda əsaslı dönüş başlandığını, xalqımızın həmrəyliyi və milli birliyinin təmin edildiyini diqqətə çatdıran B.Hüseynov bildirib ki, cəbhədə atəşkəsin əldə olunmasından sonra ölkəmizin dünya birliyinə inteqrasiyası sürətlənib. Bu kontekstdə Heydər Əliyev tanınmış xarici neft şirkətlərini Azərbaycana dəvət edərək, yeni neft strategiyasının reallaşmasına başlayıb. Ümummilli Lider Heydər Əliyev dühasının təşəbbüsü və bilavasitə xidmətləri ilə reallığa çevrilən qədim İpək Yolunun bərpası, Bakı-Tbilisi-Ceyhan, Bakı-Tbilisi-Ərzurum neft və qaz kəmərləri kimi qlobal layihələr müstəqilliyimizi sarsılmaz və əbədi edib.

“Ulu Öndərin Azərbaycan xalqı qarşısında ən böyük tarixi xidmətlərindən biri də özünü əvəz edə biləcək siyasi varis yetişdirməsi idi”, - deyən səfir əlavə edib ki, bu gün Heydər Əliyev siyasi kursunun layiqli davamçısı, Müzəffər Ali Baş Komandan, Prezident İlham Əliyevin yürütdüyü praqmatik və uzaqgörən siyasət nəticəsində Azərbaycanın ərazi bütövlüyü və suverenliyi tam bərpa olunmaqla yanaşı, ölkəmiz regionun sürətlə inkişaf edən, güclü və nüfuzlu dövlətinə çevrilib.

Diplomat ölkəmizin milli maraqlarını nəzərə alaraq, dünyanın böyük güc mərkəzləri ilə balanslaşdırılmış siyasətə üstünlük verən Heydər Əliyevin 1994-cü ildə Çinə rəsmi səfərinin və səfər zamanı imzalanmış sənədlərin iki ölkənin münasibətlərinin inkişafı üçün yol açdığını bildirib.

Sonra Heydər Əliyev Fondunun Ulu Öndərin həyatına dair hazırladığı film nümayiş olunub.

Tədbir iştirakçıları Ümummilli Liderə həsr olunan sərgi ilə tanış olublar.

Şahin Cəfərov

AZƏRTAC-ın xüsusi müxbiri

Pekin