ULU ÖNDƏRİN YUBİLEYİ SUMQAYITDA GENİŞ QEYD EDİLDİ
Mayın 10-da Sumqayıt Şəhər İcra Hakimiyyətinin, “Azərikimya” Dövlət Şirkətinin, şəhər bələdiyyəsinin, sənaye müəssisələrinin, idarə və təşkilatların rəhbərləri, işgüzar dairələrin və özəl sektorun nümayəndələri, həmçinin minlərlə şəhər sakini Azərbaycanın ümummilli lideri Heydər Əliyevin Sumqayıtın mərkəzində, onun adını daşıyan prospektdə ucaldılmış möhtəşəm abidəsinin qarşısına toplaşmışdılar. Abidənin önünə əklillər və tər çiçəklər qoyuldu. Sonra ulu öndərin xatirə mərasimi keçirildi.
Sumqayıt icra hakimiyyətinin başçısı Vaqif Əliyev tədbir iştirakçıları qarşısında çıxış edərək qeyd etdi ki, parlaq, fenomenal şəxsiyyət, hamılıqla qəbul edilmiş ulu öndər, bütün həyatını öz xalqına xidmətə həsr etmiş Heydər Əliyevin yubileyi hər yerdə böyük hörmət və ehtiramla qeyd edilir. Şəhər rəhbəri görkəmli siyasi xadim, dövlət xadimi və ictimai xadimin titanik fəaliyyətindən söhbət açaraq dedi ki, Heydər Əliyev haqlı olaraq müasir müstəqil Azərbaycanın banisi sayılır. Natiq bildirdi ki, ölkəmizin demokratik seçimi onun adı ilə bağlıdır. Məhz Heydər Əliyevin respublikaya rəhbərlik etdiyi dövrdə cəmiyyətin demokartikləşdirilməsi istiqamətində qətiyyətli addımlar atılmış, neft strategiyası yaradılmış, bunun sayəsində indi dövlətimiz regionda lider ölkəyə, dünya birliyinin layiqli üzvünə çevrilmişdir. Onun tükənməz enerjisi, gərgin əməyi, siyasi idarəetmə sahəsində böyük və zəngin təcrübəsi dövlətimizin çiçəklənməsinə və tərəqqisinə, xalqımızın mühüm problemlərinin həllinə yönəlmişdi. Respublikada yaradılmış möhkəm ictimai-siyasi sabitlik xarici biznesin və kapitalın ölkəmizin iqtisadiyyatına fəal inteqrasiyasına kömək etmişdir.
Heydər Əliyev ölkəmizin bir sıra regionlarından gəlmiş insanların doğma evinə çevrilmiş Sumqayıtı haqlı olaraq “Kiçik Azərbaycan” adlandırırdı. O, burada baş verən prosesləri diqqətlə izləyirdi. Bu da tamamilə qanunauyğundur, axı, Sumqayıtın tarixinin çox hissəsi ölkəmizə Heydər Əliyevin rəhbərlik etdiyi illərə düşür. 2003-cü il aprelin 3-də onun Sumqayıta qeyri-rəsmi səfəri ulu öndərin bu şəhərə xüsusi diqqət yetirməsinə sübutdur. Onun proqram xarakterli nitqində irəli sürülmüş vəzifələr və tövsiyələr isə respublikanın regional siyasətinin konturlarını işıqlandırdı. Bu gün başqa regionlarla bərabər Sumqayıt da intensiv inkişaf edir, abadlaşır, Azərbaycanın uğurlarının göstəricisinə çevrilir.
Şəhər rəhbəri qeyd etdi ki, respublikanın uğurları, onun inamlı və iri addımlarla irəliləməsi, dünya iqtisadi məkanına inteqrasiyası sayəsində dövlətimizin başçısı, ulu öndərin siyasi kursunun layiqli davamçısı İlham Əliyev xalqın böyük sevgisini və hörmətini qazanmışdır. Heydər Əliyev Fondunun və onun Prezidenti, YUNESKO-nun və İSESKO-nun xoşməramlı səfiri millət vəkili Mehriban Əliyevanın xalqımızın böyük liderinin zəngin irsinin arxivləşdirilməsi və geniş yayılması sahəsində uğurlu fəaliyyəti də vurğulandı.
Onu da qeyd edək ki, Heydər Əliyevin abidəsinin yaxınlığındakı meydanda qoyulmuş monitorda Azərbaycan xalqının ümummilli liderinin çoxşaxəli fəaliyyətindən, onun Sumqayıta çoxsaylı səfərlərindən və şəhər sakinləri ilə görüşlərindən bəhs edən kinoxronika kadrları nümayiş etdirilirdi. Tədbirdə ulu öndərə həsr edilmiş mahnılar da səsləndi.
Sonra mərasimə toplaşanlar Heydər Əliyev prospekti boyunca yürüş etdilər. Bu yürüş Heydər parkında başa çatdı. Şəhərdə ulu öndərin şanlı yubileyinə həsr edilmiş tədbirlər silsiləsi davam edir.
Bölmənin digər xəbərləri
