Ümumi orta təhsil bazasında keçirilən buraxılış imtahanlarının materiallarının emalı prosesi davam etdirilir
Bakı, 10 aprel, AZƏRTAC
Bu ilin mart ayı ərzində Dövlət İmtahan Mərkəzi (DİM) tərəfindən bütün respublika üzrə ümumtəhsil müəssisələrində təhsil alan şagirdlər üçün buraxılış imtahanlarının I mərhələsi keçirilib.
DİM-dən AZƏRTAC-a bildirilib ki, martın 3-ü, 10-u və 17-də cari ilin məzunları, martın 31-də isə ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul olunmaq istəyən əvvəlki illərin məzunları, əvvəlki illərdə təhsil sənədi ala bilməyən və eksternat qaydasında imtahan verən məzunlar üçün imtahanlar keçirilib. Dörd istiqamət üzrə keçirilən imtahanlarda ümumilikdə 115 mindən artıq şagird iştirak edib.
İmtahanlarda şagirdlərə tədris dili, riyaziyyat və xarici dil fənləri üzrə onların bilik və bacarıqlarını yoxlamaq məqsədilə qapalı və açıq tipli 45 tapşırıq təqdim edilib. Bu suallardan 26-sı açıq tipli, yəni yazılı cavab vermək tələb olunan tapşırıqlardır. İmtahanın birinci mərhələsində şagirdlər hər fənn üzrə maksimal 30, ikinci mərhələdə isə 70 bal toplaya bilərlər. İkinci mərhələdə yalnız qapalı tipli tapşırıqlardan istifadə olunur. Beləliklə, hər iki mərhələ üzrə 135 tapşırıqdan 109-u ənənəvi qapalı formada olan tapşırıqlardır və şagirdlər yalnız bu qapalı tapşırıqların bir hissəsinə cavab verməklə müsabiqə şərtlərini ödəyərək orta ixtisas təhsili müəssisələrinə qəbul ola bilərlər.
Yazı işləri (açıq tipli tapşırıqların cavabları) DİM və onun regional bölmələrində müvafiq təhlükəsizlik tələblərinə cavab verən ekspertiza (yoxlama) zallarında, qapalı şəraitdə, kompüter arxasında markerlər tərəfindən yoxlanılır. Yazı işlərinin yoxlanılması üçün proqram təminatı DİM-in mütəxəssisləri tərəfindən hazırlanıb.
Qeyd edək ki, yazı işlərinin markerlər tərəfindən yoxlanılmasına qədər materialların emalı bir neçə mərhələdən keçir. İlk növbədə, tikilmiş və kitabça formasında olan cavab vərəqləri kəsilərək “scan” olunmaq üçün hazırlanır. Daha sonra hər bir yazı işi “scan” edilir və elektron təsvirləri əldə olunur. Bu mərhələdə proqram vasitəsilə şagirdi identifikasiya edə biləcək məlumatlar da vərəqlərdən silinərək şifrələnmə aparılır. Növbəti mərhələdə isə xüsusi proqram vasitəsilə yazı işlərinin tapşırıqlar üzrə elektron kəsilməsi həyata keçirilir və markerlərə təqdim olunur. Dörd zona üzrə keçirilən imtahanlarda ümumi yazı işlərinin sayı ilə DİM-in rəsmi internet səhifəsində tanış olmaq mümkündür.
Ümumi yazı işlərinin sayı 3.062.546 olsa da, hər bir yazı işinin 2 marker tərəfindən qiymətləndirildiyini nəzərə alsaq (markerlərin qiymətləri arasında fərq yarandıqda həmin yazı işi proqram tərəfindən 3-cü markerə göndərilir), ən azı 6.125.092 (altı milyon yüz iyirmi beş min doxsan iki) yoxlama işi həyata keçirilir.
Yoxlama zamanı markerin kompüterinin monitorunda yazı işinin müəllifi haqqında heç bir məlumat (ad, soyad, ata adı, şagird kodu, ünvan və s.) verilmir. Monitorda yalnız yazı işi, yazı işini qiymətləndirmək üçün meyarlar və qiyməti daxil etmək üçün müvafiq sahə göstərilir. Göründüyü kimi, imtahan materiallarının emalı kifayət qədər mürəkkəb və uzun müddət tələb edən bir prosesdir. Müxtəlif təyinatlı beynəlxalq imtahanlar zamanı da iştirakçılar tərəfindən yazılı şəkildə cavablandırılması tələb olunan tapşırıqların yoxlanılması və nəticələrin elan edilməsinə 1 ay və daha çox vaxt sərf olunur.
Hazırda DİM-də qeyd olunan imtahanların materiallarının emalı prosesi (yoxlama prosesi mütəmadi olaraq DİM-in saytı vasitəsilə canlı yayımlanır) davam etdirilir və nəticələr əvvəlcədən elan olunduğu kimi, ay yarım müddətində məlum olacaq. Nəzərə almaq lazımdır ki, bu növ sonuncu imtahan bir neçə gün əvvəl martın 31-də keçirilib. Nəticələr aprelin 25-dən etibarən imtahan keçirilən zonaların ardıcıllığına uyğun mərhələ-mərhələ elan olunacaq.
DİM martın 3-də, 10-da, 17-də və 31-də keçirilmiş imtahanlarda olan hər bir fənn üzrə materialların emalı ilə əlaqədar aprelin 10-dək görülmüş işləri təqdim edir.
Azərbaycan dili fənni üzrə 1-ci, 2-ci və 3-cü zonanın bütün yazı işləri yoxlanılıb və başa çatıb. Dördüncü zona üzrə yazı işləri “scan” olunub, tapşırıqlar üzrə ayrılıb və etalonlar hazırlanılıb. Bu gün və sabah 4-cü zona üzrə yazı işlərinin yoxlanılması həyata keçiriləcək.
Rus dili (təlim dili kimi) fənni üzrə 1-ci 2-ci və 3-cü zonanın bütün yazı işləri yoxlanılıb və başa çatıb. Hazırda 4-cü zonanın yazı işləri yoxlanılır.
Riyaziyyat fənni üzrə 1-ci, 2-ci və 3-cü zonanın bütün yazı işləri yoxlanılıb. Dördüncü zona üzrə yazı işləri “scan” olunub, tapşırıqlar üzrə ayrılıb və etalonlar hazırlanılıb. Bu gün və sabah 4-cü zona üzrə yazı işləri yoxlanılacaq.
İngilis dili fənni üzrə 1-ci, 2-ci və 3-cü zonanın bütün yazı işlərinin yoxlanılması yekunlaşıb. Hazırda 4-cü zonanın yazı işləri yoxlanılır.
Alman və fransız dilləri üzrə 1-ci, 2-ci və 3-cü zonanın bütün yazı işləri yoxlanılıb və başa çatıb. Hazırda 4-cü zonanın yazı işləri yoxlanılır.
Rus dili (xarici dil kimi) fənni üzrə 1-ci, 2-ci və 3-cü zonanın bütün yazı işləri yoxlanılıb. Hazırda 4-cü zonanın yazı işlərinin yoxlanılması həyata keçirilir.
Ərəb dilindən 1-ci, 2-ci və 3-cü zonanın bütün yazı işləri yoxlanılması başa çatıb. Hazırda 4-cü zonanın yazı işləri yoxlanılır.
Fars dilindən 4-cü zonanın yazı işləri isə bu gün yoxlanılır.
Bölmənin digər xəbərləri
