Bakı, 12 sentyabr, AZƏRTAC

ABŞ-ın Beynəlxalq İnkişaf Agentliyinin (USAID) Ermənistana maliyyə yardımının miqdarını iki dəfə artırması çox təhlükəli tendensiyalar formalaşdırır. Bu, Cənubi Qafqazda aparılan sülh təşəbbüslərinə zərbə vuran addımlar kimi xarakterizə oluna bilər. Çünki USAID bütün dünyada müxtəlif hakimiyyətləri devirmək üçün səyləri gücləndirir, digər tərəfdən isə özlərinə sadiq olan siyasi dairələrə fərqli məqsədlərlə maliyyə dəstəyi göstərir.

Bu sözləri AZƏRTAC-a açıqlamasında politoloq İlyas Hüseynov söyləyib.

O bildirib ki, Ermənistanla USAID arasında işbirliyi aprelin 5-də Brüsseldə keçirilən ABŞ-Ermənistan-Avropa İttifaqı (Aİ) görüşündən sonra daha da dərinləşib. İctimaiyyətə açıqlanmasa da, görüş əsnasında ehtimal edilən bir sıra hərbi-texniki məsələlər barədə sövdələşmə əldə olunub. Lakin tərəflərin üçü də bunu gizlədib və yayılan məlumatları təkzib edib. Qeyd olunub ki, guya görüşün əsas məqsədi maliyyə dayanıqlılığının artırılmasına, Ermənistana konkret dəstəyin verilməsinə istiqamətlənib.

“Artıq iki ildir ki, Ermənistan ABŞ-la birgə təlimlər keçirir. Bundan əlavə, ABŞ Müdafiə Nazirliyinin nümayəndəsi bu ölkənin ordusunda daimi əsaslarla fəaliyyətə başlayıb. Pentaqonun nümayəndəsinin Ermənistanda olması həm də geosiyasi xarakter daşıyır. Çünki regionda marağı olan dövlətlər çoxdur. Bundan başqa, qeyd etmək lazımdır ki, Rusiyanın Sərhəd Xidmətinin İrəvanın “Zvartnots” beynəlxalq hava limanını tərk etməsindən sonra ABŞ hərbi təyyarələri tərəfindən Ermənistana daha çox silah-sursat və müxtəlif təyinatlı ləvazimatlar gətirilməyə başlandı. Ermənistana gətirilən vasitələrin əsas mahiyyəti həm də dağlıq ərazilərdə, çətin relyefli bölgələrdə hərbi əməliyyatların aparılmasına dəstək məqsədi daşıyır. Bu da birbaşa ölkəmizə qarşı təhdidləri gücləndirir”, - deyə İ. Hüseynov vurğulayıb.

Politoloqun sözlərinə görə, USAID, Aİ, “Avropa Sülh Fondu” və digər maliyyə qurumlarının Ermənistana yardımları heç də təyinatı üzrə xərclənmir, bilavasitə silahlanmağa ayrılır. “Bu məqsədlə Fransadan, Hindistandan silahlar alınır. Bu da regional gərginliyin yeni mərhələyə yüksəlməsinə xidmət edir. Digər önəmli məqam ondan ibarətdir ki, USAID-in rəhbəri Samanta Pauerin çirkli pulların yuyulmasında iştirak edən, separatçıların əsas simalarından biri sayılan, qondarma rejimin keçmiş “dövlət naziri” Ruben Vardanyanla da sıx əlaqələri olub. Bu barədə müxtəlif araşdırmalar mövcuddur. Bu da onu deməyə əsas verir ki, Azərbaycan öz ərazi bütövlüyünü təmin edib separatçılığa son qoysa da, USAID kimi qurumlar hələ də regiondakı reallıqları öz məqsədlərinə uyğun olaraq yenidən formalaşdırmaq istəyir”, - deyə o vurğulayıb.