Bakı,10 dekabr, AZƏRTAC “Sumqayıt” futbol klubunun baş məşqçisi Vaqif Cavadov AZƏRTAC-ın suallarını cavablandırıb. Həmin müsahibəni təqdim edirik:

- “Sumqayıt” sizin başçılığınız altında 8 oyunda 5 qələbə və 3 məğlubiyyətlə yadda qalıb. İşinizi necə qiymətləndirirsiniz?

- İki aya yaxın olan işimə özüm qiymət verə bilmərəm. Bu barədə rəhbərlik və azarkeşlər fikir söyləyə bilərlər. Mən öz işimi görürəm. Məqsədim hər oyunda xallar qazanmaqdır.

- Premyer Liqada ilk baş məşqçi təcrübənizi yaşayırsınız. Bəlkə də bir çoxları sizdən belə uğurlu start gözləmirdi...

- Məndən birdən-birə nəticə gözləməyənlər bəlkə də haqlıdır. Bunu da təcrübəsizlik baxımından deyə bilərlər. Lakin gənc mütəxəssislər də hansısa nöqtədən başlamalıdırlar. Onlar göydən düşmürlər. İşləyərək biliklərimizi artırırıq. Mənə bu cür şans yaratdığı üçün “Sumqayıt” klubunun rəhbərliyinə təşəkkür edirəm.

- Bəs, rəhbərlik sizin işinizi necə qiymətləndirir?

- Hələlik bununla bağlı söhbət olmayıb. Onlar mənə güvənirlər.

- Misli Premyer Liqanın XVI turunda “Neftçi” üzərində 2:0 hesablı qələbə qazandınız. Nəticə sizin üçün gözlənilməz olmadı?

- Mənim rəhbərlik etdiyim komanda meydana hər zaman qələbə əzmi ilə çıxır. Fərqi yoxdur, bu, “Neftçi” və ya başqa komanda olsun. Futboldur, istənilən nəticə ilə qarşılaşırıq.

- Oyundan sonra təşkil olunan mətbuat konfransında atanız Füzuli Cavadovla bağlı nüansa toxunduğunuz zaman kövrəldiniz. O da uzun illər “Neftçi”nin şərəfini qoruyub. Necə düşünürsünüz, atanız sağ olsaydı, “Neftçi” üzərində əldə etdiyiniz qələbəyə görə sizə ilk sözü nə olardı?

- Atam hər zaman mənim yanımda olub. İlk sözü “Oğlum, təbrik edirəm” olardı. Daha sonra isə öpüb-qucaqlayar, bu qələbəni süfrə arxasında qeyd edərdi.

- Hazırda komandanız 19 xalla 6-cı pillədə qərarlaşıb. Azərbaycan Kubokunda da mübarizəni davam etdirirsiniz. “Sumqayıt” üçün avrokuboklara ölkə çempionatı, yoxsa kubok vasitəsilə vəsiqə qazanmaq daha rahat olar?

- Avrokuboklar barədə düşünmürük. Qarşıdakı oyunları fikirləşirik. Hər şeyi zaman göstərəcək. Sadəcə, hazırkı əhvali-ruhiyyəni davam etdirib, gələcək matçlarda uğurlu nəticələr qazanmaq istəyirik.

- Siz “Sumqayıt”a müvəqqəti baş məşqçi təyin olunmusunuz. Yəqin ki, uğurlu nəticələr davam edərsə, bu status dəyişəcək...

- Bunu klub rəhbərliyi daha yaxşı bilər. Bütün fikrimi işimə yönəltmişəm.

- Qış transfer pəncərəsində komandada nə kimi dəyişikliklər gözlənilir?

- Acığı, hələlik ciddi dəyişiklik yoxdur. Sadəcə, Fernando Medeyros zədə səbəbindən iki həftədir bizimlə deyil. Nələrin olacağını zaman göstərəcək.

- Futbolçu kimi legioner həyatı yaşamısınız. Məşqçilik karyeranızda da bunu təkrarlamaq istərdiniz?

- Əvvəlcə özümü məşqçi kimi formalaşdırmaq və nəticə vermək istəyirəm. Bundan sonra həmin suala daha rahat cavab vermək olar. Hazırkı arzum “Sumqayıt”ın yaxşı yerlərdə olmasıdır.