Bakı, 2 avqust, AZƏRTAC

“Sabah” və “Zirə” komandaları sübut etdilər ki, Avropa klubları Azərbaycan təmsilçilərinə qarşı mübarizə aparmaqda çətinlik çəkirlər”.

Bu sözləri AZƏRTAC-a açıqlamasında veteran futbolçu Vaqif Sadıqov “Sabah” və “Zirə” komandalarının Konfrans Liqasının III təsnifat mərhələsinə vəsiqə qazanmaları barədə danışarkən deyib.

O, “Sabah”ın layiqli şəkildə növbəti raunda adladığını bildirib: “Sabah” bizə böyük bir həyəcan yaşatdı. İnanılmaz 120 dəqiqə və sonda penalti zəfəri yekunlaşan qələbə hissi... Bu oyuna dərmansız baxmaq çətin idi. Komandamız bizi həyəcandan öldürüb-diriltdi (gülür). İlk görüşdə 3:0 hesablı qalib gələn “tələbələr”ə cavab matçında da böyük təzyiq var idi. Düşünürəm ki, klub rəhbərliyinin illərdir həyata keçirdiyi işin bəhrəsini görməyə başlayırıq”.

Mütəxəssis təmsilçimizin “Makkabi” ilə ikinci matçda da çəkinmədən mübarizə apardığını söyləyib: “Hər kəs Krunoslav Renduliçin komandasının cavab qarşılaşmasında müdafiə futbolu oynayacağını düşünürdü. Lakin meydanda fərqli ssenari izlədik. Əlbəttə, buraxılan 6 topda müdafiəçilərin səhvləri oldu. Fikrimcə, bu cür görüşlər oyunçuların inkişafına və komandanın gələcək uğurlarına böyük təkan verəcək”.

66 yaşlı futbol veteranının fikrincə, “Zirə” Slovakiyanın "Dunayska Ştreda" komandasını ilk matçda məğlub etməsinə baxmayaraq, cavab görüşündə hücum futbolu oynayıb: “Rəşad Sadıqovun yetirmələri iki möhtəşəm oyun sərgilədi. “Qartallar” meydanda çəkinmədən mübarizə aparırdılar. Görünürdü ki, komanda səfərdə də qalib gəlmək istəyir. Bunun nəticəsi olaraq 2:1 hesablı qələbə əldə etdilər”.

V. Sadıqov “Sabah”ın “Sent Patriks Atletik”lə (İrlandiya) və “Zirə”nin “Osiyek” (Xorvatiya) kollektivləri ilə Konfrans Liqasının III təsnifat mərhələsində üz-üzə gələcəyi oyunlarda Azərbaycan təmsilçilərinin favorit olduğunu bildirib: “İndi həmin rəqiblər bizi hansı yolla mübarizədən kənarlaşdıracaqlarını düşünməlidir. İkinci təsnifat mərhələsində olan komandalar daha güclü idi. İnanıram ki, bu raundu da rahatlıqla keçəcəyik”.

Qeyd edək ki, “Sabah” penaltilər seriyasında “Makkabi”ni 3:2, “Zirə” isə iki oyunun nəticəsinə əsasən "Dunayska Ştreda"nı 6:1 hesabı ilə məğlub edərək növbəti raunda vəsiqə qazanıb.