“Vətənpərvər gənclik parlaq gələcəyimizin təminatıdır” mövzusunda tədbir keçirilib
Bakı, 22 aprel, AZƏRTAC
Aprelin 22-də “Konstitusiya və Suverenlik İli” çərçivəsində Yeni Azərbaycan Partiyasının (YAP) Mərkəzi Aparatı, YAP Xətai rayon təşkilatı və Xətai Rayon İcra Hakimiyyətinin birgə təşkilatçılığı ilə “Vətənpərvər gənclik parlaq gələcəyimizin təminatıdır” mövzusunda tədbir keçirilib.
AZƏRTAC xəbər verir ki, tədbir iştirakçıları əvvəlcə Ulu Öndər Heydər Əliyevin abidəsini və Zəfər parkını ziyarət ediblər. Ardınca YAP Xətai rayon təşkilatının qərargahında davam edən tədbirdə şəhidlərin əziz xatirəsi bir dəqiqəlik sükutla yad olunub, Dövlət Himni səsləndirilib.
Giriş nitqi ilə çıxış edən YAP Xətai rayon təşkilatının sədri Ramil Mirzəyev bildirib ki, Prezident İlham Əliyev tərəfindən 2025-ci ilin “Konstitusiya və Suverenlik İli” elan olunması tarixi baxımdan mühüm qərardır. Bu il həm Konstitusiyanın qəbulunun 30, həm də Zəfərimizin 5 illiyidir. R.Mirzəyev qeyd edib ki, bu uğurların qazanılmasında gənclərin əvəzsiz rolu var, bu isə onların vətənpərvərlik ruhunda tərbiyə almasından irəli gəlir.
YAP Mərkəzi Aparatının Gender siyasəti və gənclərlə iş şöbəsinin müdiri Zəkiyyə Musayeva çıxışında qeyd edib ki, Azərbaycanda gənclər siyasəti hər zaman dövlətin prioritet istiqamətlərindən biri olub. O, əsas məqsədin gəncləri Vətənə sədaqət ruhunda böyütmək və onların hərtərəfli inkişafını təmin etmək olduğunu vurğulayıb.
Ulu Öndər Heydər Əliyevin rəhbərliyi ilə hazırlanan ilk Konstitusiyanın müstəqil dövlət quruculuğunun əsasını qoyduğunu bildirən Xətai Rayon İcra Hakimiyyətinin başçısı Rafiq Quluyev şanlı Qələbəmizin qazanılmasının əsaslarının Ümummilli Lider Heydər Əliyev tərəfindən qoyulduğunu qeyd edib.
“Ulu Öndər Heydər Əliyev tərəfindən əsası qoyulan siyasətin Prezident İlham Əliyev tərəfindən uğurla davam etdirilməsi nəticəsində dövlətimiz bütün istiqamətlərdə gücləndi. Nəticə etibarilə, ölkəmiz möhtəşəm Qələbəyə imza ataraq öz ərazi bütövlüyü və suverenliyini təmin etdi”, - deyə R.Quluyev əlavə edib.
Çıxış edən YAP Veteranlar Şurasının sədr müavini, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova isə deyib ki, gənclər hər bir xalqın sabahıdır və onların fəal, vətənpərvər və təşəbbüskar olması dövlətin inkişafına töhfə verir. Azərbaycanın gələcəyini təmin edən əsas qüvvə də məhz bu ruhda yetişdirilən gənclərdir.
Ulu Öndər Heydər Əliyev gənclərin inkişafına böyük önəm verdiyini diqqətə çatdıran YAP Gənclər Birliyinin sədri Bəxtiyar İslamov vurğulayıb ki, bu gün bu siyasət Prezident İlham Əliyev tərəfindən uğurla davam etdirilir. O bildirib ki, Vətən müharibəsi Azərbaycan tarixinin ən parlaq səhifələrindən biridir və gənc nəslin əsas vəzifəsi bu Qələbəni qorumaq və gələcək nəsillərə ötürməkdir.
Vətən Müharibəsi Qəhrəmanı Zaur Hüseynov diqqətə çatdırıb ki, Azərbaycan gəncləri döyüşlərdə böyük rəşadət və cəsurluq nümayiş etdiriblər: “Onlar sübut etdilər ki, Vətən üçün can verməyə hazırdırlar. Bu qəhrəmanlıq salnaməsini gələcək nəsillər də fəxrlə xatırlayacaq”.
Sonra tədbir interaktiv formada davam edib, iştirakçıların sualları cavablandırılıb. Sonda partiya sıralarına yeni qəbul olunan şəxslərə üzvlük vəsiqələri təqdim olunub və Yeni Azərbaycan Partiyasının Himni səsləndirilib.
Bölmənin digər xəbərləri
