REGİONLAR
Vüqar Qurbanov: Məqsədimiz vərəmə yoluxmuş xəstələrin şəraiti daha yaxşı olan tibb müəssisələrində müalicə almasıdır
Saray, 24 may, Ə.Rzayeva, AZƏRTAC
Əvvəllər “COVID-19”a yoluxmuş xəstələr üçün istifadə etdiyimiz Saray modul xəstəxanası vərəm xəstələrinin müalicəsi üçün istifadə olunmağa başlayır. 200 çarpayı fondu olan Saray modul tipli Vərəm Əleyhinə Xəstəxana Bakı və Sumqayıt şəhərlərində, Abşeron və Xızı rayonlarında yaşayan əhaliyə vərəm əleyhinə tibbi xidmət göstərəcək.
AZƏRTAC xəbər verir ki, bunu Saray modul tipli Vərəm Əleyhinə Xəstəxananın açılışında jurnalistlərə açıqlamasında TƏBİB-in İcraçı direktoru Vüqar Qurbanov bildirib.
O qeyd edib ki, yeni modul xəstəxana müasir avadanlıqlarla təmin olunub: “Burada ağciyər vərəmi diaqnozlu xəstələrlə yanaşı, ağciyərdən kənar orqanların vərəminin müalicəsi də aparılır. Bu, Bakı şəhəri və Abşeronda çarpayı fonduna görə hazırda ən böyük xəstəxanalardan biridir. Vərəmə yoluxmuş xəstələr ölkəmizdə az sayda olsa da, onların müalicəsi ölkə səhiyyəsi üçün önəmlidir. Məqsədimiz də bu cür xəstələrin şəraiti daha yaxşı olan tibb müəssisələrində müalicə almasıdır”.
