Vyanada “Əli və Nino”nun öz evinə uzun dönüş yolu” adlı məruzə axşamı təşkil edilib VİDEO
Vyana, 25 aprel, AZƏRTAC
Vyanada Azərbaycan Mədəniyyət Mərkəzində Azərbaycan ədəbiyyatında özünəməxsus yerə malik, müxtəlif imzalar altında bənzərsiz əsərlər yaratmış Məhəmməd Əsəd bəyin (Qurban Səid və ya Lev Nussimbaum) anadan olmasının 120 illiyi münasibətilə onun ən məşhur əsəri “Əli və Nino“ romanına həsr olunmuş tədbir təşkil olunub.
AZƏRTAC xəbər verir ki, tədbiri giriş sözü ilə açan Azərbaycan Mədəniyyət Mərkəzinin rəhbəri Leyla Qasımova ikigünlük məruzələrin mahiyyəti barədə danışıb.
Qeyd edilib ki, maraqlı ədəbi-bədii yaradıcılığa malik müəllifin fəaliyyətinin bütün mərhələlərini işıqlandırmaq üçün Azərbaycan, Almaniya və Avstriyadan araşdırmaçılar bu tədbirlərə dəvət ediliblər. Məhəmməd Əsəd bəyin irsinin araşdırmaçıları Yaqut Abdalla, Sebastian Yanuşevski və Hans-Yürqen Maurer öz məruzələrində ədibin həyat və yaradıcılığının müxtəlif dövr və aspektləri barədə danışıblar.
Sonra tanınmış tədqiqatçı və şərqşünas Fuad Axundov “Əli və Nino”nun öz evinə uzun dönüş yolu” adlı məruzə ilə çıxış edib. Məruzədə 1937-ci ildə ilk dəfə Vyanada işıq üzü görən əsərin Avropa və Amerikadan keçməklə hadisələrin cərəyan etdiyi Bakıya qədər keçdiyi nəşr yoluna nəzər salınıb. Eyni zamanda, əsər üzərində müəllifliklə bağlı onillərdən bəri mövcud olan müxtəlif fərziyyə, iddia və ehtimallara dair faktlar, sənədlər və araşdırmaçıların gəldiyi qənaətlərdən söz açılıb.
F.Axundov Qurban Səid təxəllüsünün arxasında dayanan Lev Nussimbaumun (1905-1942) həyat yolundan ətraflı bəhs edib, onun Bakıdakı uşaqlıq dövrü, Almaniya və Avstriyadakı yaradıcılıq fəaliyyəti və həmçinin xəstəlik və tənhalıq içərisində keçən məşəqqətli İtaliya mərhələsindən danışıb.
Məruzədə, həmçinin “Əli və Nino” romanında hadisələrin cərəyan etdiyi Bakı mühiti, tarixi hadisələr və tarixi və mədəni xüsusiyyətlər barədə ətraflı məlumat verilib. Sonra əsərin müxtəlif dillərə tərcümə və nəşr tarixi, müxtəlif alimlərin mövzu ilə bağlı fikirləri və həmçinin bu əsərin incəsənətin müxtəlif istiqamətlərinə göstərmiş olduğu təsirdən bəhs edilib.
Bölmənin digər xəbərləri
