ELM VƏ TƏHSİL
Vyanada “Gələcəyə doğru” xeyriyyə fondunun təqdimatı olmuşdur
Vyana, 1 may (AZƏRTAC). Vyanada Azərbaycanın Avstriyadakı səfiri olmuş mərhum diplomat Fuad İsmayılovun xatirəsinə yaradılmış “Gələcəyə doğru” xeyriyyə fondunun təqdimat mərasimi keçirilmişdir.
Azərbaycanın Avstriyadakı səfirliyində keçirilən tədbirdə bu ölkədə akkreditə olunmuş diplomatik korpusun və ATƏT yanında daimi nümayəndəliklərin təmsilçiləri, ölkə ictimaiyyətinin nümayəndələri, bu ölkədə yaşayan soydaşlarımız iştirak etmişlər.
Mərasimi giriş sözü ilə açan Azərbaycanın Avstriyadakı səfiri Qalib İsrafilov mərhum diplomat Fuad İsmayılovun fəaliyyətindən bəhs etmiş, onun Avstriya-Azərbaycan münasibətlərinin inkişafında gördüyü işlərə toxunmuşdur. Səfir qeyd etmişdir ki, F.İsmayılov Azərbaycanın maraqlarını Avstriyada ən yüksək səviyyədə təmsil etməklə yanaşı, ölkəmizin Vyanada fəaliyyət göstərən beynəlxalq təşkilatlarla, xüsusilə də BMT qurumları və ATƏT-lə əlaqələrin inkişafına böyük töhfə vermişdir.
Fondun həmtəsisçisi Leyla Qasımova yeni yaradılmış təşkilat barədə məlumat vermiş, fondun elm-təhsil və mədəni-humanitar sahələrdə müxtəlif layihələri dəstəkləyəcəyini, eləcə də Azərbaycan ilə Avstriya arasında əlaqələrin gücləndirilməsi üçün geniş fəaliyyət göstərəcəyini qeyd etmişdir.
Avstriya-Azərbaycan Ticarət Palatasının (ATAZ) prezidenti Qabriel Lanski, Avstriya Ali Məhkəməsinin keçmiş sədri Yohann Reşut və digər natiqlər mərhum səfir F.İsmayılovu öz ölkəsini böyük məhəbbətlə sevən vətənpərvər insan, peşəkar diplomat, gözəl dost kimi xarakterizə etmişlər.
Tədbirin bədii hissəsində “Aron” kvarteti görkəmli bəstəkarlar Yozef Haydn, Cakomo Puççini, Frans Şubertin əsərlərini ifa etmişlər. Tanınmış cazmen-pianoçu Emil Əfrasiyab isə xarici bəstəkarların əsərləri ilə yanaşı, müəllifi olduğu “İki dünya” və “Sonsuzluq” improvizasiyalarını səsləndirmişdir.
Sonda qonaqlar üçün ziyafət verilmişdir.
Elgün Niftəliyev
AZƏRTAC-ın xüsusi müxbiri
Vyana
Bölmənin digər xəbərləri
