Bakı, 25 sentyabr, AZƏRTAC

Bu gün Vyanada Atom Enerjisi üzrə Beynəlxalq Agentliyin (AEBA) Baş Konfransının 67-ci illik sessiyası açılacaq.

AZƏRTAC xarici KİV-lərə istinadla xəbər verir ki, sessiyada təşkilata üzv ölkələrin nümayəndələri Ukraynada nüvə təhlükəsizliyi məsələləri və Şimali Koreyada Nüvə Silahının Yayılmaması Müqaviləsi çərçivəsində təminatların tətbiqi də daxil olmaqla bir neçə mövzunu müzakirə edəcəklər.

AEBA-nın Baş Konfransı çərçivəsində sentyabrın 26-27-də nüvə texnologiyası ilə bağlı elmi forum da keçiriləcək. Beynəlxalq ekspertlər enerji istehsalının gələcəyi üçün nüvə reaktorlarının rolunu müzakirə edəcəklər. Konfransda nüvə enerjisinin inkişafı üçün süni intellekt və rəqəmsallaşmanın əhəmiyyəti araşdırılacaq. Forumun açılışında AEBA rəhbəri Rafael Qrossi çıxış edəcək.

Konfransın bütün plenar iclasları və elmi forumun sessiyaları hər gün təşkilatın internet saytında canlı yayımlanacaq.

Qeyd edək ki, tədbir ənənəvi olaraq Vyana Beynəlxalq Mərkəzində keçirilir və sentyabrın 29-dək davam edəcək.