XƏZƏR DƏNİZİNİN AZƏRBAYCAN SAHİLİNDƏ YENİ, MÜASİR TİPLİ KURORT ZONASI YARADILACAQDIR
AZƏRTAC xəbər verir ki, Xəzər dənizinin Azərbaycan sahilində yeni, müasir tipli kurort zonası yaradılacaqdır.
Kurort zonasının yaradılması üzrə investisiyalar təxminən 1 milyard ABŞ dolları məbləğində qiymətləndirilir.
Bu barədə tanınmış iş adamı, “Krokus” qrupunun sahibi, Ümumrusiya Azərbaycan Konqresinin vitse-prezidenti Araz Ağalarov məlumat vermişdir.
A.Ağalarov demişdir ki, Azərbaycan qədim tarixi və zəngin mədəniyyəti olan bir ölkədir. Azərbaycanı dünyada bu baxımdan tanıtmaq üçün belə bir yerdə kurort zonasının yaradılması zəruridir. Hazırda kurort zonasının yaradılması istiqamətində iş aparılır.
“Krokus” qrupunun sahibi bildirmişdir ki, layihəni reallaşdırmaq üçün dünyamiqyaslı mütəxəssislərin cəlb edilməsi tələb olunur. Kurort zonası Bakının Nardaran və Pirşağı qəsəbələri arasındakı sahədə yerləşəcək və təxminən 300 hektar ərazini əhatə edəcəkdir.
A.Ağalarov Azərbaycan iqtisadiyyatının digər sahələrində də imkanların araşdırıldığını və rəhbərlik etdiyi qrupun istehsal sahəsində fəaliyyət göstərmək ehtimalını da istisna etməmişdir.
Bölmənin digər xəbərləri
