Yaponiya ABŞ-ın polad və alüminiuma tətbiq etdiyi rüsumların ləğvinə çalışacaq
Tokio, 24 mart, AZƏRTAC
Yaponiya hökuməti bu ölkənin adının ABŞ-ın polad və alüminium üçün yeni rüsumların tətbiqi siyahısından çıxarılmasına çalışacaq.
AZƏRTAC xəbər verir ki, bu barədə martın 23-də Yaponiyanın iqtisadiyyat, ticarət və sənaye naziri Hiroşiqe Seko məlumat verib.
Nazir deyib: “Yaponiyanın yeni rüsumların tətbiqi barədə siyahıya daxil edilməsi böyük təəssüf doğurur. Biz ABŞ tərəfinin Yaponiyanı həmin siyahıdan çıxarması üçün mümkün olan hər şeyi edəcəyik”. H.Seko, həmçinin qeyd edib ki, ABŞ-ın müttəfiqi olan Yaponiyadan ixrac bu ölkənin sənayesinin təhlükəsizliyinə mənfi təsir göstərə bilməz.
Yaponiya hər il ABŞ-a 2 milyon ton polad ixrac edir ki, bu da yapon polad ixracının cəmi 5 faizinə bərabərdir.
Qeyd edək ki, ABŞ-da poladtökmə və alüminium sənayesi üçün məhsullara ixrac rüsumlarının müvafiq olaraq 25 faiz və 10 faiz artırılması barədə sərəncam martın 23-də qüvvəyə minib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
