Yaponiya hökuməti Serqey Skripalla bağlı məsələyə münasibətdə mövqeyini açıqlayıb
Tokio, 31 mart, AZƏRTAC
Yaponiya hökuməti Serqey Skripalla bağlı məsələyə münasibətdə mövqeyini açıqlayıb. Hökumət bəyan edib ki, o, Böyük Britaniyada Serqey Skripalın və onun qızının qətlinə cəhdlə bağlı Rusiyaya münasibətdə ABŞ və digər ölkələrin mövqeyinə uyğun hərəkət etməyəcək.
AZƏRTAC NHK telekanalına istinadla xəbər verir ki, bu barədə Yaponiyanın Baş naziri Şinzo Abe Böyük Britaniyanın Baş naziri Tereza Mey ilə telefon danışığı zamanı bildirib.
Xatırladaq ki, artıq dünyanın 20-dən çox ölkəsi Rusiya diplomatlarını öz ərazilərindən çıxaracaqlarını elan edib. Böyük Britaniya və digər ölkələr Yaponiyanı Rusiyaya münasibətdə daha kəskin mövqe nümayiş etdirməyə çağırır.
Baş vermiş hadisəyə münasibət bildirən Yaponiya hökuməti kimyəvi silahdan istifadəni tənqid edib və faktların britaniyalı və beynəlxalq müstəntiqlər tərəfindən tezliklə təsdiqini gözlədiyini deyib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
