Yaponiyada Azərbaycanın uğurlu sosial siyasətinə həsr olunmuş elmi sessiya keçirilib
Tokio, 15 iyul (AZƏRTAC). Yaponiyanın Yokohama şəhərində XVIII Dünya Sosiologiya Konqresi çərçivəsində Azərbaycanın sosial siyasəti və ölkəmizin sosial inteqrasiya sahəsində əldə etdiyi təcrübəyə həsr olunmuş elmi sessiya keçirilib.
Dörd ildən bir keçirilən Dünya Sosiologiya Konqresi sosiologiya elmində və praktikasında ən mötəbər hadisə sayılır. Dünyada böyük nüfuza malik olan bu Konqresdə görkəmli universitetlərin, aparıcı elmi mərkəzlərin, qeyri-hökumət təşkilatlarının və sosiologiya sahəsində fəaliyyət göstərən digər qurumların alim və mütəxəssisləri iştirak edirlər. Bu Konqresin iştirakçıları arasında ictimai rəyin öyrənilməsində böyük nailiyyətləri olan və aparıcı dövlətlərin daxili və xarici siyasətinə təsir göstərən Gellap, Harris və digər institutlar təmsil olunurlar.
Dünya Sosiologiya Konqresində Azərbaycan Respublikasının Prezidenti yanında Elmin İnkişafı Fondunun dəstəyi ilə keçirilən Azərbaycan Elmi Sessiyasının təşkilatçıları isə Azərbaycan Respublikasının Prezidenti yanında Dövlət İdarəçilik Akademiyası və Azərbaycan Sosiologiya Assosiasiyası olub.
Elmi sessiyanın rəhbəri, Dövlət İdarəçilik Akademiyasının “Sorğu” Sosioloji Araşdırmalar İnstitutunun direktoru Rüfət Quliyev çıxış edərək Azərbaycanda sosial siyasət sahəsində əldə edilmiş nailiyyətlərdən, əhalinin bütün sosial qruplarının ölkəmizdə vüsət alan sosial-iqtisadi inkişafda fəal iştirakından bəhs edib. Konqresdə əsası ulu öndər Heydər Əliyev tərəfindən qoyulmuş uğurlu sosial siyasət, ölkəmizin bütün sahələrdə əldə etdiyi nailiyyətlər, əhalinin sosial-siyasi fəallığı, erməni işğalı nəticəsində yurd-yuvalarından didərgin düşmüş qaçqın və məcburi köçkünlərə göstərilən qayğı haqqında məruzə və çıxışlar olub.
Sessiya ilə bağlı AZƏRTAC-ın Yaponiyadakı xüsusi müxbirinin sualını cavablandıran Rüfət Quliyev Azərbaycana həsr edilmiş müzakirələr barədə deyib: “Qeyd etmək lazımdır ki, Dünya Sosiologiya Konqresinin Elmi Sessiyalarında bir qayda olaraq qlobal, bütün dünya üçün çox böyük əhəmiyyət kəsb edən ən aktual problemlər müzakirə olunur. Hansısa tək bir ölkənin təcrübəsinə gəldikdə isə bu, çox nadir hallarda, bir istisna kimi Konqresin elmi sessiyalarının müzakirəsinə çıxarılır. Bu, yalnız o halda baş verir ki, müzakirəyə çıxarılan ölkənin təcrübəsi hər hansı qlobal əhəmiyyətli problemin yeni, orijinal həlli yolunu göstərsin və dünyanın digər ölkələri üçün nümunə olaraq problemin qlobal miqyasda həllinə təkan versin.
Konqresdə Azərbaycanda əhalinin sosial inteqrasiyasına həsr olunmuş elmi sessiyanın yer alması göstərdi ki, dünya sosiologiya ictimaiyyəti Azərbaycan dövlətinin “Qara qızılı insan kapitalına çevirmək” konsepsiyasını, ölkədə “hamıya xidmət edən cəmiyyətin” yaradılması və bu məqsədlə bütün sosial təbəqələrin quruculuq fəaliyyətinə cəlb edilməsini bəyənir və bu sahədə Azərbaycanın zəngin təcrübəsinin öyrənilməsi və dünya ölkələri arasında geniş yayılmasını məqsədəuyğun sayır.
Azərbaycan Elmi Sessiyası Konqresdə dünyanın bir çox ölkələrini təmsil edən sosioloqların böyük marağına səbəb oldu. Onlar xüsusi diqqətlə Azərbaycanda sosial sahənin inkişafında böyük rol oynayan və artıq bütün dünyada öz zəngin humanitar fəaliyyəti ilə rəğbət qazanan Heydər Əliyev Fondu və onun prezidenti, Azərbaycanın birinci xanımı Mehriban Əliyevanın çoxşaxəli fəaliyyəti ilə yaxından tanış oldular. Həmçinin ölkəmizin bu sahədə nailiyyətlərinin önəmli olmasını və qazanılmış təcrübənin başqa ölkələrdə də təbliğ və tətbiq edilməsi zərurətini vurğuladılar”.
Dünya Sosiologiya Konqresi işini iyulun 18-dək davam etdirəcəkdir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
