Yaponiyanın ANA aviaşirkəti uçan taksilərin hazırlanmasına investisiya ayıracaq
Tokio, 15 fevral, AZƏRTAC
Yaponiyanın “All Nippon Airways” (ANA) aviaşirkəti “Toyota Motor” şirkətini tərəfdaşı olan ABŞ-ın “Joby Aviation” şirkəti ilə birlikdə uçan taksilərin hazırlanmasına investisiya ayıracaq.
AZƏRTAC xəbər verir ki, bu barədə fevralın 15-də yayılmış birgə mətbuat məlumatında bildirilir. Qeyd edilir ki, “Joby Aviation” şirkəti özündə həm helikopter, həm də təyyarənin xüsusiyyətlərini birləşdirən beş nəfərlik elektrik uçan taksinin hazırlanmasını həyata keçirir.
Uçan taksinin maksimum sürətinin saatda 320 kilometr, uçuş məsafəsinin isə təqribən 240 kilometr olduğu qeyd edilir. Yaponiyanın ikinci böyük şəhəri olan Osakanın mərkəzi vağzalından şəhər kənarında yerləşən “Kansay” aeroportuna qədər olan məsafəni bu taksinin 15 dəqiqəyə qət edəcəyi gözlənilir. Avtomobillə hərəkət zamanı buna bir saat vaxt sərf olunur.
ANA şirkətinin uçan taksinin naviqasiya sistemləri, uçuş-enmə meydançası və digər bu kimi məsələlərlə məşğul olacağı bildirilir. “Joby Aviation” şirkətinin tərəfdaşı olan “Toyota Motor” şirkəti isə bu nəqliyyat vasitəsinin yerdə hərəkətinin təşkilini öz üzərinə götürüb.
Xatırladaq ki, Yaponiya hökumətinin dəstəyi ilə bu ölkədə uçan avtomobillərin yaradılması üzrə əlaqələndirmə şurası yaradılıb. ANA və “Toyota Motor” şirkətləri həmin şuranın üzvləridir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
