Yaz mövsümü ilə əlaqədar müşahidə olunan qrip və respirator virus infeksiyaları təbii haldır
Bakı, 22 aprel, AZƏRTAC
Yaz mövsümü ilə əlaqədar olaraq uşaqlar və böyüklər arasında qrip və kəskin respirator virus infeksiyalarına yoluxma saylarında artım müşahidə olunması təbii hal kimi qiymətləndirilir. Bu tip kəskin respirator virus infeksiyalarının əksəriyyəti yüngül klinik simptomlarla keçir, fəsadlaşmır. Bir çox hallarda etioloji müalicə ehtiyacı olmadan baş və əzələ ağrıları, ümumi zəiflik kimi intoksikasiya əlamətləri səngiyir, iştaha yaxşılaşır, boğaz ağrıları və öskürək keçib gedir, bədən hərarəti normallaşır və xəstəlik qısa vaxt ərzində sağalma ilə nəticələnir.
AZƏRTAC xəbər verir ki, bunu TƏBİB-in Yoluxucu xəstəliklər və infeksion nəzarət şöbəsinin məsləhətçisi Çinarə Hacıyeva deyib. Onun sözlərinə görə, risk qruplarına aid bəzi şəxslərdə xəstəliklərin ağır keçməsi, fəsadlaşması, arzuolunmaz nəticələrə səbəb olması mümkündür:
“Yaz aylarında uşaqlar arasında rotavirus infeksiyası da yayılır və əsasən, 5 yaşınadək uşaqlar arasında özünü büruzə verir. Xəstəliyin əsas əlamətləri qusma, yüksək hərarət və ishaldır.
Yaz mövsümündəki xəstəliklərin ilk günlərində etioloji müalicə ehtiyacı olmadan yüngül simptomatik müalicə ilə xəstənin vəziyyətində yaxşılaşma müşahidə edilir. Lakin yüksək temperatur 5-7 gündən çox davam etdikdə, hərarətsalıcı dərmanlara tabe olmadıqda, kəskin zəiflik, halsızlıq, təngnəfəslik, boğulma halları müşahidə edildikdə, habelə oksigen saturasiyasının aşağı düşməsi, arterial təzyiqin enməsi, döş qəfəsində darlıq hissinin, ağrıların olması hallarında həkim-mütəxəssisə müraciət edilməsi tövsiyə olunur”.
Ç.Hacıyeva qeyd edib ki, mövsüm dəyişkənliyi ilə əlaqəli olaraq yaz-yay aylarında yoluxucu xəstəliklərlə yanaşı, allergik xəstəliklərin də artması müşahidə edilir: “Allergik xəstəliklərin simptomları, əsasən, burun, boğaz və gözlərdə müşahidə edilir. Burun axıntısı, gözlərin acışması və sulanması, tez-tez asqırmaq, dərinin qızarması, başağrısı və s. allergiyaya xas olan ilkin simptomlardır. Bəzi oxşar simptomlarla əlaqədar mövsümi allergik xəstəliklərlə kəskin respirator virus infeksiyalarını fərqləndirmək çətinləşir. Belə hallarda həkim-allerqoloqların konsultasiyası vacibdir”.
Nizami Tibb Mərkəzinin həkim-terapevti Samirə Qəribova isə bildirir ki, hava-damcı yolu ilə keçən infeksiyalara immun sisteminin zəifləməsi nəticəsində daha çox rast gəlinir:
“Bu zaman müalicə vaxtında və düzgün aparılmalıdır. Çünki düzgün müalicə aparılmayan respirator xəstəliklər pnevmoniya, abses, virus infeksiyaları isə meningit, otit, haymorit və s. ağırlaşmalar verə bilər. Ən çox rast gəlinən əlamətlər isə öskürək, boğazda qıcıqlanma, təngnəfəslik, yüksək hərarət, başağrıları, dispepsik simptomlar, limfoadenopatiya və digərləridir. Virus infeksiyaları zamanı müalicə, əsasən, simptomatik aparılmalıdır. Bakterial ağırlaşmalar olduqda isə etioloji faktorlar nəzərə alınır.
Orqanizmin xəstəliklərə qarşı mübarizəsində immun sistemin rolunu nəzərə alaraq immun sistemi balansda saxlamaq üçün düzgün qidalanmaya, yuxu rejiminə, stresdən uzaq olmağa riayət edilməsi arzuolunandır. Həmçinin virusların ötürülmə yollarını nəzərə alaraq şəxsi gigiyena qaydalarına riayət olunması (əl gigiyenasına nəzarət, respirator gigiyena, sosial məsafənin qorunması və s.) xəstəliklərə yoluxmanın qarşının alınmasında ən effektiv üsullardan biridir”.
Mütəxəssislər vurğulayırlar ki, ev şəraitində yalnız yüngül simptomatik müalicə tövsiyə olunur. Empirik antibiotik istifadəsi və venadaxili infuziyalar arzuolunmazdır, ev şəraitində həkim tövsiyəsi olmadan başlanılan bu kimi müalicələr insan sağlamlığına daha ciddi ziyan vura bilər.
Bölmənin digər xəbərləri
