Bakı, 28 dekabr (AZƏRTAC). Reuters agentliyinin verdiyi məlumata görə, Yəmənin cənubunda separatçı dəstələrin silahlı üzvlərindən birinin dəfni ilə əlaqədar mərasim keçirilən çadırda toplaşmış insanlara tankdan atəş açılmış, nəticədə 15 nəfər həlak olmuş, daha 40 adam yaralanmışdır. Ölənlər arasında yetkinlik yaşına çatmayanların da olduğu bildirilir.

Hadisə Əl-Dali əyalətindəki məktəbin ərazisində baş vermişdir.

Müdafiə Nazirliyindən alınmış məlumata görə, atəş açılması hərbi qulluqçunun səhvi üzündən baş vermişdir. Hazırda həmin şəxsin barəsində istintaq aparılır.

Bununla bərabər, Müdafiə Nazirliyi hadisə barədə heç bir rəsmi şərh verməmişdir.

SABA Dövlət İnformasiya Agentliyinin məlumatına görə, ölkə prezidenti Abdulla Rəbbu Mənsur Hadi hadisənin təhqiq edilməsi üçün komissiya yaradılması barədə sərəncam vermişdir.