YENİ SUALTI KƏMƏR İNŞA OLUNACAQ
Azərbaycan Respublikası Dövlət Neft Şirkətindən (ARDNŞ) AZƏRTAC-a bildirmişlər ki, Prezident İlham Əliyevin göstərişinə əsasən şirkətin həyata keçirdiyi qaz proqramında 2008-ci ildə ölkədə qaz hasilatının 8 milyard kubmetrə çatdırılması nəzərdə tutulur.
“Günəşli” yatağında 2006-cı ilə nisbətən hasilatın həcmi iki dəfə artırılmalıdır. Bu vəzifələrin yerinə yetirilməsi üçün Neft Daşlarındakı qazpaylayıcı məntəqədən “Bahar” yatağınadək ötürmə qabiliyyəti sutkada 5-5,5 milyon kubmetr olacaq 66,5 kilometrlik sualtı qaz kəmərinin çəkilişi planlaşdırılıb. Bu məqsədlə Yunanıstandan 126 vaqon boru gətirilmişdir. Bu həmin marşrutla çəkiləcək üçüncü xətt olacaqdır və kəmər əvvəlki xətdən 50-100 metr aralıda inşa ediləcəkdir.
Qaz kəmərinin layihəsi “Neftqazlayihə” İnstitutu tərəfindən hazırlanmışdır. Tikintinin baş podratçısı “Neftqaztikinti” tresti, subpodratçı isə “McDermott” şirkəti olacaqdır. Kəmərin çəkiləcəyi ərazidə dənizin dərinliyi 10-30 metr arasındadır. Kəmərin inşası “İsrafil Hüseynov” borudüzən gəmisi vasitəsilə həyata keçiriləcəkdir. Hazırda borular betonlaşdırılmaq üçün EUPEC zavoduna göndərilmişdir. Kəmər bu ilin sonunadək istismara veriləcəkdir.
Bölmənin digər xəbərləri
