Yeniyetmələr arasında intellektual oyunlar olimpiadasının Sədərək rayon birinciliyi başa çatıb
Sədərək, 4 aprel, AZƏRTAC
“Naxçıvan Muxtar Respublikası-95” devizi altında yeniyetmələr arasında intellektual oyunlar olimpiadasının Sədərək rayon birinciliyinə yekun vurulub.
Naxçıvan Muxtar Respublikası Gənclər və İdman Nazirliyindən AZƏRTAC-ın Naxçıvan bürosuna bildirilib ki, olimpiada çərçivəsində yarışlar “Xəmsə”, “Poliqon” və “Vətəni tanı” intellektual oyunları üzrə vahid turnir şəklində keçirilib.
“Xəmsə” milli intellektual oyununun yekun nəticələrinə görə Sədərək kənd 2 nömrəli tam orta məktəbin “Qeyrət qalası” komandası I, Heydərabad qəsəbə tam orta məktəbin “Qartal” komandası II, Sədərək kənd 1 nömrəli tam orta məktəbin “Günnüt” komandası isə III yerə layiq görülüblər.
“Poliqon” strateji intellektual oyununda səsləndirilən 24 sualdan daha çoxuna cavab verən Sədərək kənd 2 nömrəli tam orta məktəbin “Mübariz” komandası qalib adını qazanıb. Qaraağac kənd tam orta məktəbin “Əlincə” komandası II, Sədərək kənd 1 nömrəli tam orta məktəbin “Şahin” komandası III olub.
“Vətəni tanı” intellektual oyununda pazl şəklində olan Azərbaycanın xəritəsini daha tez və tam olaraq quran Sədərək kənd 2 nömrəli tam orta məktəbin “Sərhədçi” komandası hamıdan üstün olub. Digər iki pillədə isə Sədərək kənd 1 nömrəli tam orta məktəbin “Qarabağ” və Qaraağac kənd tam orta məktəbin “Qaraağac” komandaları qərarlaşıblar.
Qaliblərə təşkilatçıların diplomları, fəxri fərmanları, oxunması zəruri olan kitablar, həmçinin Azərbaycan və dünya ədəbiyyatı nümunələri təqdim edilib.
Qeyd edək ki, intellektual oyunu Naxçıvan Muxtar Respublikası Gənclər və İdman, Təhsil nazirlikləri, Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyi və “Gənclərin İntellektual İnkişaf Mərkəzi” İctimai Birliyi birgə keçirib. Qalib komandalar may ayında keçiriləcək muxtar respublika birinciliyində rayonu təmsil edəcəklər.
Bölmənin digər xəbərləri
