Yunanıstan yığmasının sabiq futbolçusu: “Araz-Naxçıvan” və “Aris” arasında 2 maraqlı oyun izləyəcəyik - EKSKLÜZİV
Bakı, 19 iyun, AZƏRTAC
Yunanıstan millisinin keçmiş futbolçusu, karyerası ərzində ölkəsində "Panatinaikos", Almaniyada "Bayer" (Leverkuzen), "Herta" (Berlin), "Ayntraxt", İspaniyada "Levante", həmçinin Türkiyədə "Konyaspor" , "Əskişəhərspor", "Akhisar Bələdiyyəspor" və "Sivasspor" kimi komandalarda çıxış etmiş Teofanis Gekas UEFA Konfrans Liqasının 2-ci təsnifat mərhələsində "Araz-Naxçıvan" və "Aris" arasında keçiriləcək oyunlar haqqında danışıb.
Veteran hücumçu AZƏRTAC-a eksklüziv açıqlamasında püşkatmanın nəticəsini və komandaların şanslarını dəyərləndirib.
O, azarkeşlərin 2 maraqlı oyuna şahidlik edəcəklərini bildirib: "Püşkatma dünən olub. Buna görə də "Araz-Naxçıvan" barədə məlumatım yoxdur. Çətin matç olacaq. Hansı komanda diqqətli olsa və az səhv etsə, mərhələni adlayacaq. "Aris"in ev oyunlarında yaxşı atmosfer olur. Bu da onlar üçün əlavə üstünlük deməkdir".
45 yaşlı veteran futbolçu Azərbaycanda idmana, xüsusilə futbola böyük sərmayə qoyulduğunu söyləyib: "Bu da inkişaf üçün atılmış mühüm addımlardan biridir".
Qeyd edək ki, UEFA Konfrans Liqasında II təsnifat mərhələsinin görüşləri iyulun 24-ü və 31-də keçiriləcək. "Araz-Naxçıvan" ilk matçı evdə, cavab qarşılaşmasını isə səfərdə keçirəcək.
Bölmənin digər xəbərləri
