Bakı, 26 may (AZƏRTAC). Yunanıstan Mərkəzi Bankının məlumatına görə, ötən ilin müvafiq dövrü ilə müqayisədə ölkənin turizmdən əldə etdiyi gəlir 15 faiz azalmışdır. Bu, əsasən Almaniya, Britaniya və Rusiyadan ölkəyə gələn turistlərin sayının azalması ilə bağlıdır. Rusiya və Almaniyadan ölkəyə gələn turistlərin sayında kəskin azalma qeydə alınmışdır.

Almaniyalılardan sonra ölkənin əsas turizm bazarı hesab edilən Britaniyadan gələn turistlərin sayı da 11 faiz azalmışdır.

İlin birinci rübündə Yunanıstana gələn turistlərin sayında isə ümumilikdə 11.7 faiz azalma qeydə alınmışdır. Həmçinin turistlərin ölkədə xərclədiyi pul vəsaitinin orta göstəricisi də 3,8 faiz aşağı düşmüşdür.

Ekspertlər bildirmişlər ki, bu cür mənfi tendensiya turizm sektorundan əldə edilən gəlirlər vasitəsilə ölkə iqtisadiyyatını canlandırmaq barədə plana ciddi maneə yaradacaqdır.