REGİONLAR
“Zaqatala AGRO İndustry” MMC-nin emal məntəqəsində indiyədək 251,5 ton quru tütün istehsal edilib
Zaqatala, 2 oktyabr, Mustafa Dadaşov, AZƏRTAC
Yaponiyanın “Tet İnternational Development” şirkətinin törəmə müəssisəsi olan “Zaqatala AGRO İndustry” MMC tərəfindən bu il Balakən, Zaqatala, Qax və Şəki rayonlarında 389,5 hektar sahədə “Virciniya botaniki” növlü tütün əkilib. Hazırda şirkətin Zaqatala rayonunda fəaliyyət göstərən tütünqurutma məntəqəsində fermerlərdən yaş tütünün qəbulu davam edir. Mövsümün əvvəlindən bu günədək məntəqəyə istehsalçılardan 2305,6 ton yaşıl tütün kütləsi daxil olub.
Bu barədə AZƏRTAC-ın bölgə müxbirinə “Zaqatala AGRO İndustry” MMC-dən məlumat verilib.
Bildirilib ki, tütün istehsalı ilə əlaqədar bu il həmin rayonlarda 47 fermerlə müqavilə bağlanılıb. Bağlanılan müqavilələr üzrə tütün əkiləcək sahələr 238,5 hektar təşkil edir. Eyni zamanda, cari mövsümdə fermerlər fərdi müqavilələr üzrə şirkət tərəfindən verilmiş toxumla təsərrüfatlarında 151 hektar sahədə tütün əkiblər.
Fermerlərdən Təranə Quliyeva indiyədək qəbul məntəqəsinə 327,3 ton, Əzizxan Şabanov 124,6 ton, Mustafa Qallayev 123,5 ton, Həsən Abdullayev 117, Fərid Qalayev 112,3 ton, Akif Kələşov 111,9 ton yaş tütün təhvil veriblər.
Məntəqədən verilən məlumata görə, indiyədək emal məntəqəsində 251,5 ton quru tütün istehsal edilib.
Qeyd edək ki, ötən il müəssisədə 311 ton quru tütün istehsal edilib və məhsul əsasən Rusiya bazarlarına ixrac olunub.
Bölmənin digər xəbərləri
