Bakı, 21 aprel, Kifayət Əliyeva, AZƏRTAC

Aprelin 21-də Bakıda Azərbaycan Respublikası Müəllif Hüquqları Agentliyinin (MHA) təşkilatçılığı ilə Dünya Kitab və Müəlliflik Hüququ Gününə həsr olunan “Müəllif və riyakarlıq, kitab və yalan (erməni tarixi saxtakarlıqları silsiləsindən)” mövzusunda konfrans keçirilib.

AZƏRTAC xəbər verir ki, tədbirdə dövlət qurumlarının nümayəndələri, Milli Məclisin deputatları, tanınmış elm adamları və kütləvi informasiya vasitələrinin təmsilçiləri iştirak ediblər.

Əvvəlcə iştirakçılar son illər MHA tərəfindən müxtəlif dillərdə nəşr etdirilən çap məhsulları ilə tanış olublar.

MHA-nın sədri Kamran İmanov konfransın əhəmiyyətindən danışaraq bildirib ki, UNESCO tərəfindən təsis edilən 23 aprel - Dünya Kitab və Müəlliflik Hüququ Günü Azərbaycanda 1997-ci ildən qeyd edilir və müxtəlif tədbirlərlə müşayiət olunur. Bunun da səbəbi bəllidir: kitabın və müəllifliyin tarixi özlüyündə bəşəriyyətin tarixidir. Çünki kitab yalnız fiziki obyekt deyil, bəşəriyyətin ən dahi ixtiralarından biridir, zaman və məkan sərhədlərini aşan ideyalar, biliklər mənbəyidir. Azərbaycan xalqının əlifba və yazı, müəllif və əlyazmaları, kitab və adət-ənənəsində əks olunmuş müəlliflik hüququnun zəngin tarixi var. 12 min il tarixi olan Qobustan qayaüstü yazıları və rəsmləri, təxminən 1500 illik tarixi olan “Kitabi-Dədə Qorqud” dastanının əlyazmaları, dahi Nizami və Füzuli yaradıcılığı buna parlaq sübutdur.

K.İmanov vurğulayıb ki, hazırda erməni mifomaniyası tarixi sübutlar, elmi dəlillər və danılmaz faktlarla ifşa olunmaqdadır. Bugünkü konfrans da həmin missiyaya xidmət edən növbəti tədbirdir. Ermənilərin sifarişi ilə yazılan, muzdlu xarici müəlliflər tərəfindən yayılan çoxsaylı “əsərlər” riyakarlığa əsaslanaraq tarixi saxtalaşmaya yol açır, kitab və məqalələrə çevrilərək dünyaya yalan toxumu səpir, beynəlxalq ictimai rəyi çaşdırmaq niyyəti güdür. Tarixin ermənisayağı “yeniləşməsi” çoxlu “erməni yadelli nağıllarına”, maddi və qeyri-maddi irsimizlə bağlı saxtakarlıqlara və uydurmalara, xalqımıza məxsus olan və ermənilər tərəfindən özününküləşdirilən folklorumuza, erməni etnosunun əməyi, intellekti olmayan və mentallığına sığışmayan hər şeyə aiddir.

Azərbaycan xalqının mədəni irsinin yüz illər boyunca ermənilər tərəfindən “gəldim, gördüm,… mənimsədim” prinsipi üzrə oğurlanması onların torpaqlarımıza olan ərazi iddiaları ilə sıx bağlıdır. “Böyük Ermənistan” haqqında mifin reanimatorlarının niyyətləri kifayət qədər aydındır: gəlmə etnos olan ermənilər onlara məxsus olmayan torpaqlara aid ərazi iddialarının “əsaslandırılmasını” həmin torpaqların həqiqi sakinlərinə məxsus maddi və qeyri-maddi irsin mənimsənilməsi və erməniləşdirilməsi ilə əlaqələndirirlər. Ermənilərin əqli və maddi-mədəni oğurluqları tarixi-coğrafi uydurmalarla, özlərinə yalançı tarix formalaşdırmaq cəhdləri ilə və əlbəttə ki, Azərbaycanın və bütövlükdə bölgənin tarixini təhrif etməklə müşayiət olunur.

Prezident İlham Əliyevin aprelin 10-da Nazirlər Kabinetinin iclasında qeyd etdiyi kimi, bizim cəmiyyətimiz, xüsusilə gənc nəsil heç vaxt unutmamalıdır ki, Ermənistan dövləti tarixi Azərbaycan torpaqları üzərində qurulub. Bu bizim tarixi dədə-baba torpaqlarımızdır. Bütün toponimlər Azərbaycan mənşəlidir. Bunu bilmək üçün XX əsrin əvvəllərində çar Rusiyasında tərtib olunan xəritələrə baxmaq kifayətdir. Orada bir dənə də erməni toponimi tapmaq mümkün deyil. Ermənistanda bütün kəndlərin 80 faizi Azərbaycan mənşəli adlar daşıyır. Yəni bu, bizim tarixi torpaqlarımızdır və biz mütləq o torpaqlara qayıdacağıq. Başqa cür mümkün deyil. Bu, bizim strateji hədəfimizdir və biz bu hədəfə çatmaq üçün çalışırıq, çalışacağıq.

MHA-nın sədri qeyd edib ki, müəllifi və yaradıcısı ulu öndər Heydər Əliyev olan müasir milli müəllif-hüquq sistemimiz 1993-cü ildən başlayaraq böyük inkişaf yolu keçib. Müstəqil Azərbaycanın əqli mülkiyyət üzrə 1996-cı ildə qəbul olunmuş ilk “Müəlliflik hüququ və əlaqəli hüquqlar haqqında” Qanunu ölkəmizin əqli mülkiyyət sisteminin beynəlxalq sistemə inteqrasiyasına yol açıb.

Eyni zamanda Ulu Öndərin tövsiyələri sayəsində 2003-cü ildə Avropa məkanında ilk dəfə olaraq, MHA tərəfindən hazırlanmış “Azərbaycan folklor nümunələrinin qorunması haqqında” Qanun qəbul edilib. 2002-ci ildə isə “İnteqral sxem topologiyalarının hüquqi qorunması haqqında” Qanun qüvvəyə minib. Prezident İlham Əliyevin tapşırıqlarına əsasən, bu qanunlarda müasir dövrün tələblərindən irəli gələn dəyişikliklər və əlavələr aparılıb. Bununla yanaşı, müəllif-hüquq qanunvericiliyi zənginləşib, 2004-cü ildə “Məlumat toplularının hüquqi qorunması haqqında” Qanun, 2012-ci ildə isə “Əqli mülkiyyət hüquqlarının təminatı və piratçılığa qarşı mübarizə haqqında” Qanun qəbul olunub. Azərbaycan Dünya Əqli Mülkiyyət Təşkilatının (DƏMT) rəhbər Koordinasiya Komitəsində təmsil olunur və bizim nümayəndə MDB ölkələri arasında ilk dəfə olaraq DƏMT-nin “Müəlliflik hüququna dair Müqaviləsi”nin Assambleyasının sədri seçilib. Dünya İqtisadi Forumunun rəqabətqabiliyyətliliklə bağlı müvafiq Hesabatlarında göstərildiyi kimi, əqli mülkiyyətin qorunmasında Azərbaycan institutları MDB məkanında 2013-2014-cü illərin Hesabatına əsasən, şərhsiz lider mövqeyindədir.

Hazırda Müəllif Hüquqları Agentliyi tam kompyuterləşmiş, tərkibində müasir texnologiyaları və avadanlığı, SMART-təlim distant sistemi, müasir Hüquqların Təminatı Mərkəzi və rəqəmli hüquqların idarə olunması Xidməti, yeni tələblərə uyğun olan mətbəə ilə təchiz edilmiş və “Elektron Hökumət” portalına qoşulmuş və beş növ elektron xidmətlər həyata keçirən dövlət orqanıdır.

K.İmanov bildirib ki, işğalçı Ermənistanın Azərbaycana qarşı yönəlmiş informasiya müharibəsi son illər daha həyasızlıqla həyata keçirilir və bu, Azərbaycan torpaqlarını işğal etmiş dövlətin aqressiv mahiyyətinin üstünə pərdə çəkməyə xidmət edir. Elə bu səbəbdən də yalan və saxtakarlıq, ikiüzlülük və riyakarlıq Azərbaycana qarşı başlanmış informasiya müharibəsinin daimi yol yoldaşlarıdır. Prezident İlham Əliyev informasiya və əks-təbliğat işinin qurulmasında bu amilin nəzərə alınmasına, dünya ictimaiyyətinin və siyasi dairələrin diqqətini cəlb etmək üçün daha genişmiqyaslı və müntəzəm tədbirlərin həyata keçirilməsinə çağıraraq, bütövlükdə saxta erməni təbliğatını ifşa etmək vəzifəsini qarşıya qoyub. Prezidentin bu tapşırığını yerinə yetirərək və Ulu Öndərin “Azərbaycan xalqının mənəviyyatına, milli qüruruna və mənliyinə yönəlmiş böhtanlara biz qiymət vermək borcunu tarixin hökmü kimi qəbul edirik” sözlərini rəhbər tutaraq, erməni yalanlarını ifşa edirik və edəcəyik.

Konfransda çıxış edən UNESCO üzrə Azərbaycan Respublikası Milli Komissiyasının birinci katibi Günay Əfəndiyeva bildirib ki, təmsil etdiyi qurum artıq bir neçə ildir Müəllif Hüquqları Agentliyi ilə birgə Dünya Kitab və Müəlliflik Hüququ Gününü qeyd edir. UNESCO və Azərbaycan üçün bu günün qeyd olunması böyük əhəmiyyət daşıyır və insanların özlərinə məxsus mənəviyyata, mədəni irsə həqiqi mənada sahib çıxmasına və onların qorunmasına xidmət edir. Əsas məqsəd kitablara, qədim nəşrlərə, əlyazmalara, bu gün bütün dünyanı əhatə edən virtual kitabxanaya marağı artırmaq, eyni zamanda, müəllif hüquqlarına hörməti təşviq etmək, cəmiyyətin davamlı inkişafı üçün maarifçiliyi ön plana çıxarmaqdır. Bu baxımdan bugünkü tədbir ölkəmiz üçün çox aktualdır.

Prezident İlham Əliyevin müvafiq sərəncamlarına əsasən ədəbiyyatımız Azərbaycan dilində nəşr olunur və kitabxanalara paylanılır. Eyni zamanda, Heydər Əliyev Fondunun prezidenti Mehriban xanım Əliyevanın dəstəyi və təşəbbüsü ilə Azərbaycan mədəniyyətini, ədəbiyyatını, Qarabağ həqiqətlərini əks etdirən kitablar müxtəlif xarici dillərə tərcümə olunaraq dünya ictimaiyyətinə çatdırılır.

G.Əfəndiyeva qeyd edib ki, UNESCO üzrə Azərbaycan Respublikasının Milli Komissiyası üçün ən prioritet məsələlərdən biri də Dağlıq Qarabağ məsələsidir. Bu baxımdan müəllif hüquqları deyərkən, ilk növbədə, Ermənistan tərəfindən işğal olunmuş torpaqlarımız, talan edilən tarixi, mədəni abidələrimiz yada düşür. Milli Komissiya bununla bağlı müxtəlif layihələr həyata keçirir. Onlardan biri Azərbaycan Milli Elmlər Akademiyasının İnsan Hüquqları İnstitutu ilə birgə reallaşdırılan “Işğal altında olan ərazilərdə mədəni irsin qorunması və onlara vurulan ziyanların hesblanması” layihəsidir. Yaxın vaxtlarda bu kitab bir neçə dildə nəşr olunacaq. Təkcə maddi mədəni irsə deyil, qeyri-maddi mədəni irsimizə də ermənilər tərəfindən sahiblənmək cəhdləri göstərilir. Bu mənada Azərbaycanın qədim oyunu - çövkənin UNESCO-nun Təcili Qorunmaya Ehtiyacı Olan Qeyri-Maddi Mədəni İrs Siyahısına salınması bizim böyük nailiyyətimizdir.

Daha sonra G.Əfəndiyeva UNESCO-nun baş direktoru İrina Bokovanın Dünya Kitab və Müəlliflik Hüququ Günü münasibətilə müraciətini oxuyub.

Mədəniyyət və turizm nazirinin birinci müavini Vaqif Əliyev tədbirin əhəmiyyətindən söz açaraq bildirib ki, hazırda respublikada 12 mindən çox kitabxana fəaliyyət göstərir. Bu gün Azərbaycan həqiqətlərinin dünyaya çatdırılmasında kitabların böyük rolu var. Odur ki, ölkəmiz beynəlxalq kitab yarmarkalarında fəal təmsil olunur, Azərbaycanın tarixi, mədəniyyəti, mətbəxi barədə məlumatlar xarici dillərdə yayılan kitablar, müxtəlif konfranslar vasitəsilə dünyaya çatdırılır. Tarixçi alimlərimiz, mədəniyyət və incəsənət nümayəndələrimiz erməni yalanlarının qarşısını almaq üçün bütün səylərini birləşdirməlidirlər.

Azərbaycan Prezidenti Administrasiyasının ictimai-siyasi məsələlər şöbəsinin sektor müdiri Fuad Axundov konfransın aktuallığına görə böyük əhəmiyyət daşıdığını qeyd edərək deyib: Biz hamımız bütün dövlət qurumları və elm ocaqları ilə birgə informasiya müharibəsində birgə iştirak etməli və erməni tarixçilərinə tutarlı cavab verməliyik. Prezident İlham Əliyev bu məsələyə çox böyük önəm verir. Bu sahədə bir sıra nailiyyətlərimiz var. Keçmiş Sovet hakimiyyəti dövründə tariximiz saxtalaşdırılırdı və bu işdə bədnam qonşularımız - ermənilər xüsusi canfəşanlıq göstərərək onu istədikləri istiqamətə yönəldirdilər. İndi Azərbaycan müstəqil dövlətdir və artıq öz tarixşünaslığımızdan danışa bilərik. Hazırda biz tarixşünaslığımızı elmi əsaslarla inkişaf etdiririk. Ümid edirəm ki, müasir informasiya texnologiyaları əsrində, ümumiyyətlə virtual məkanda istədiyimiz nəticələrə daha tez nail olacağıq.

Təhsil nazirinin müavini Firudin Qurbanov vurğulayıb ki, kitab zamanın bütün dövrlərində təkcə bilik mənbəyi deyil, həm də əvəzsiz sərvət hesab olunub. Bu baxımdan, ölkənin kitabxanalarında qorunan minlərlə kitab xalqımızın milli sərvətidir. Kitablar xalqa məxsus olan ən yüksək dəyərləri özündə əks etdirir və bu dəyərlərin dünyaya çatdırılmasında böyük rol oynayır. Təhsil Nazirliyi məktəblilər və tələbələr arasında kitabın, mütaliənin təbliği məqsədilə bir sıra layihələr həyata keçirir. Hazırda elektron kitabxanaların yaradılması istiqamətində nazirlik tərəfindən ciddi işlər görülür.

TÜRKSOY-un baş katibi Düsen Kaseinov Azərbaycandakı tərəfdaşları ilə birlikdə türk mədəniyyətini, tarixini dünyaya tanıtmaq üçün göstərdikləri səylərdən danışıb. Təşkilatın 1993-cü ildə yaradıldığını bildirən baş katib vurğulayıb ki, o zamanlar Azərbaycan xalqının ümummilli lideri Heydər Əliyevin, sonralar isə Prezident İlham Əliyevin dəstəyi olmasaydı, TÜRKSOY böyük uğurlar qazana bilməzdi. D.Kaseinov MHA-nın təşkil etdiyi konfransın müəllif hüquqlarının tanınması istiqamətində yeni bir addım olacağına əminliyini bildirib.

Tədbirdə K.İmanovun “Özü-özünü təkzib edən erməniçilik müəllif hüququ”, Azərbaycan Milli Elmlər Akademiyası İnsan Hüquqları İnstitutunun elmi işçisi Elşad Əlilinin “Saxtakar tarixçi Xorenatsi müasir erməni saxtakarlarının təqdimatında” mövzusunda məruzələri dinlənilib.

Mövzularla bağlı müzakirələrdə AMEA-nın Nəsimi adına Dilçilik İnstitutunun direktoru, akademik Tofiq Hacıyev, Milli Məclisin deputatı, professor Xanhüseyn Kazımlı və başqaları çıxış edərək fikir və mülahizələrini bildiriblər. Konfransın əhəmiyyətindən danışan natiqlər qeyd ediblər ki, Azərbaycan elminin, kitabının təbliği ilə Azərbaycan özü təbliğ olunur. Ermənilər türklərin tarixini, mədəniyyətini öz adlarına çıxmaqla saxta tarixlərini yaratmağa çalışırlar. Nankor qonşularımızın belə bədnam əməllərinin, saxtakarlıqlarının ifşasında bu cür tədbirlərin böyük əhəmiyyəti var. Ona görə də bu mövzuda konfransların tez-tez keçirilməsi, buraya beynəlxalq ekspertlərin də dəvət edilməsi məqsədəuyğun olardı.