Bakı, 24 dekabr, Samirə Allahverdiyeva, AZƏRTAC

Dekabrın 24-də Azərbaycan Milli Elmlər Akademiyasının (AMEA) İnsan Hüquqları İnstitutunda bu elm müəssisəsinin Milli Fəaliyyət Proqramının (MFP) 2.1 bəndinin icrası üzrə üçillik hesabatına həsr edilən “dəyirmi masa” keçirilib.

AZƏRTAC xəbər verir ki, tədbirdə bir sıra dövlət qurumlarının, nazirlik və əlaqədar təşkilatların nümayəndələri iştirak ediblər.

İnstitutun direktoru, Milli Məclisin deputatı Aytən Mustafayeva rəhbərlik etdiyi qurumda Milli Fəaliyyət Planına uyğun olaraq üç ildə həyata keçirilən tədbirlər, layihələr, nəşr olunan kitablar, əməkdaşların bu istiqamətdə fəaliyyətləri barədə geniş məlumat verib. Bildirilib ki, Prezident İlham Əliyevin “Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramının təsdiq edilməsi haqqında” 2011-ci il 27 dekabr tarixli Sərəncamının icrası ilə əlaqədar bu elm müəssisəsi doqquz bənd üzrə icra orqanı kimi qeyd olunub.

A.Mustafayeva deyib ki, cari ildə institut tərəfindən MFP-nın “Ermənistanın Azərbaycana qarşı təcavüzü nəticəsində qaçqın və məcburi köçkün düşmüş şəxsləri hüquqlarının kütləvi şəkildə pozulması, işğal nəticəsində Azərbaycanın təbii, tarixi və mədəni sərvətlərinin dağıdılması faktının dünya ictimaiyyətinə çatdırılması və onlara dəymiş zərərin Ermənistan dövləti tərəfindən ödənilməsi məqsədilə beynəlxalq təşkilatlarda işin davam etdirilməsi” adlı 2.1-ci bəndinə uyğun olaraq Azərbaycan Respublikası Prezidentinin İşlər İdarəsinin Siyasi Sənədlər Arxivinin binasında “Xocalıya ədalət!” beynəlxalq təbliğat və maarifləndirmə kampaniyası həyata keçirilib. İnstitut tərəfindən “Leyla Əliyeva: Xocalıya Ədalət (beynəlxalq erməni terroruna qarşı yeni strateji model)” adlı üçcildlik çap olunub. Hazırda həmin kitabın rus dilinə tərcüməsi başa çatmaq üzrədir.

Vurğulanıb ki, müasir beynəlxalq hüquqa uyğun olaraq hər hansı bir dövlətin hüquqa zidd əməlləri nəticəsində dəyən zərərin ödənilməsi resitusiya, kompensasiya və satisfaksiya formalarında həyata keçirilə bilər. Azərbaycana dəyən maddi və mənəvi ziyanın ödənilməsi probleminin həlli Ermənistan-Azərbaycan, Dağlıq Qarabağ münaqişəsinin hərtərəfli nizamlanmasının və erməni təcavüzünün nəticələrinin aradan qaldırılmasının, həmçinin torpaqlarımızın işğaldan azad edilməsinin mühüm aspektlərindəndir.

Bu işlərin növbəti illərdə də davam etdiriləcəyini vurğulayan A.Mustafayeva bildirib ki, 2015-ci ildə Moldova, Almaniya və digər ölkələrdən tədqiqatçıların İnsan Hüquqları İnstitutunda Ermənistan-Azərbaycan, Dağlıq Qarabağ münaqişəsinin təhlili ilə məşğul olması planlaşdırılır.