Strasburq, 30 yanvar, AZƏRTAC 

Yanvarın 30-da AŞPA-nın iclasında “Avropada xüsusilə xristianlara münasibətdə tolerantsızlıq və ayrı-seçkilik hallarına qarşı mübarizə” mövzusunda məruzə ilə bağlı müzakirələrdə çıxış edən Azərbaycan nümayəndə heyətinin üzvü Qənirə Paşayeva mövzu haqqında fikirlərini bildirməklə yanaşı, böhtan xarakterli fikirlər səsləndirən Ermənistan nümayəndə heyətinə sərt cavab verib.

Ermənistan dövlətinin etnik təmizlə, soyqırımı, terrorla məşğul olduğunu diqqətə çatdıran Q.Paşayeva Assambleyanı bu addımlara qarşı sərt addımlar atmağa çağırıb. O deyib: “Avropa məkanında rasizmin, nifrətin, tolerantsızlığın artması bizi ciddi narahat etməlidir və təşkilata üzv ölkələr bunun qarşısını almaq üçün birgə addımlar atmalıdırlar. Biz xristianlara, müsəlmanlara, yəhudilərə, dini inancından və etnik kimliyindən asılı olmayaraq bütün dinc insanlara qarşı hücumları pisləməliyik. Belə halların artmaması üçün dini inancımızdan və etnik kimliyimizdən, harada baş verməsindən, kimlər tərəfindən kimlərə qarşı törədilməsindən asılı olmayaraq birlikdə mübarizəmizi daha da gücləndirməliyik. Avropa bizim ümumi evimizdir və yaşadığımız acıları gələcək nəsillərin yaşamaması üçün biz rasizmə, dozümsüzlüyə qarşı birgə mübarizəmizi daha da gücləndirməliyik. Əslində məruzəçinin qətnamə layihəsində vurğuladığı bir sıra problemlərin həlli üçün ən önəmli məsələlərdən biri ondan ibarətdir ki, Avropa məkanında gənc nəsillər etnik kökündən, dini kimliyindən, cinsi və sosial statusundan asılı olmayaraq hər kəsə qarşı tolerant və hörmət hissi ilə böyüməlidir. Amma təəssüf ki, bəzi üzv ölkələrdə bir sıra siyasətçilərin çıxışları, KİV-lərdə yayılan məlumatlar tam əksinə, dözümsüzlüyün, nifrət və rasizmin artmasına xidmət edir. Mən bu kimi hallardan əziyyət çəkmiş bir ölkənin nümayəndəsiyəm və dözümsüzlüyün, nifrətin, rasizmin nələrə gətirib çıxara biləcəyini görmək üçün ölkəmin yaxın tarixinə aid bəzi məlumatları sizinlə bölüşmək istəyirəm. Ermənistanda tolerantsızlığın, nifrətin və rasizmin siyasətçilərin çıxışlarında, təhsil sistemində və KİV-lərdə geniş yayılması nəticəsində etnik təmizləmə siyasəti aparılan bu ölkədə bütün azərbaycanlılar zorla öz evlərindən, ata-baba yurdlarından qovuldular. Bundan sonra Ermənistan Azərbaycan torpaqlarını işğal edərək 20 mindən çox azərbaycanlını qətlə yetirdi, Xocalıda soyqırımı həyata keçirdi. Bir milyondan artıq azərbaycanlı öz evindən zorla qovularaq qaçqın və məcburi köçkün vəziyyətinə salındı. Onlar 20 ildən artıqdır ki, öz evlərinə qayıda bilmirlər”.

Ermənistanda rasizmin, dözümsüzlüyün, etnik təmizləmə siyasətinin bölgədə nə qədər böyük faciələrə yol açdığını deyən Q. Paşayeva Assambleyanı və üzv dövlətləri bu cür addımlar atan ölkələrə qarşı sərt münasibət göstərməyə çağırıb və bildirib ki, ciddi mübarizə aparılmazsa belə mənfi tendensiyalar arta bilər. Deputat Assambleya tərəfindən Ermənistanın işğal etdiyi Azərbaycan ərazilərinin geri qaytarılmasının tələb edildiyi 1416 saylı qətnamə qəbul olunsa da, rəsmi Yerevanın həmin qətnaməni yerinə yetirmək üçün heç bir addım atmadığını diqqətə çatdırıb. O, bu məsələdə Ermənistana ciddi təzyiqlər göstərməyə çağırıb və bildirib ki, təşkilat bir üzv ölkənin digərinin ərazilərini işğal altında saxlamasına, qurumun əsas prinsiplərini kobud şəkildə pozmasına sərt münasibət ortaya qoymalıdır.

Əsgər Əliyev

AZƏRTAC-ın xüsusi müxbiri

Strasburq