12-də “Hyyat Regency” otelində Avropa Birliyi - Azərbaycan biznes forumu keçirilmişdir.

Avropa Birliyi ilə ölkəmizin işgüzar dairələri arasında bu miqyasda ilk dəfə keçirilən forumun əlaqələndiricisi kimi Azərbaycan Respublikasının İqtisadi İnkişaf Nazirliyi çıxış etmişdir.

Forumda Azərbaycan Respublikası Nazirlər Kabinetinin, iqtisadi inkişaf, xarici işlər, maliyyə, ədliyyə, vergilər, kənd təsərrüfatı, yanacaq və energetika nazirliklərinin, Dövlət Gömrük Komitəsinin nümayəndələri, eləcə də Böyük Britaniya və Şimali İrlandiya Birləşmiş Krallığı, Almaniya, Fransa, İtaliya və Yunanıstanın ölkəmizdəki səfirliklərinin, beynəlxalq təsisatların təmsilçiləri, Azərbaycanın və Avropa Birliyi üzvü olan ölkələrin bir sıra şirkətləri iştirak edirdilər.

Forumu iqtisadi inkişaf naziri Fərhad Əliyev açmışdır. Nazir Azərbaycan Respublikası Prezidentinin yerli və xarici sahibkarlarla bu yaxınlarda keçirilmiş görüşlərindən sonra ölkədə investisiya və sahibkarlıq mühitinin yaxşılaşdırılması istiqamətində mühüm tədbirlərin həyata keçirildiyini bildirmiş, Avropa Birliyi və Azərbaycan arasında münasibətlərin, beynəlxalq təşkilatlarla əlaqələrin inkişafındakı irəliləyişlər, Azərbaycanın ÜTT-yə üzv olması sahəsində görülən işlər, ölkəmizdə investisiya və sahibkarlıq mühitinin yaxşılaşdırılması sahəsində həyata keçirilən tədbirlər barədə forum iştirakçılarına geniş məlumat vermişdir. F.Əliyev xarici şirkətlərin Azərbaycana marağının yüksəldiyini vurğulamış, ölkə iqtisadiyyatına cəlb edilən xarici investisiya qoyuluşunun ilbəil artdığını, bu sahədə Avropa Birliyinin üzvü olan ölkələrin şirkətlərinin xüsusi önəm kəsb etdiyini qeyd etmişdir. İqtisadi inkişaf naziri Azərbaycanın ÜTT-yə üzv olmasına Avropa Birliyi ölkələrinin dəstək verdikləri üçün onlara minnətdarlıq etmiş, bu ölkələrlə Azərbaycanın işgüzar dairələri arasında əməkdaşlığın genişləndirilməsi üçün Avropa Birliyi - Azərbaycan Ticarət Palatasının yaradılmasını təklif etmişdir.

Forumda Avropa Birliyinin üzvü olan ölkələrlə Azərbaycanın işgüzar dairələri arasında əməkdaşlığın genişləndirilməsi, Avropa Birliyi şirkətlərinin Azərbaycanın qeyri-neft sektorunun inkişafında rolu, kiçik və orta sahibkarlığın inkişafı, “Yoxsulluğun azaldılması üzrə Dövlət proqramı”nın həyata keçirilməsində Avropa Birliyinin mümkün yardım formalarının dəyərləndirilməsi, bu istiqamətdə Avropa Yenidənqurma və İnkişaf Bankının imkanlarının, Azərbaycanın kənd təsərrüfatı məhsullarının Avropa Birliyi ölkələrinə çıxarılması yollarının araşdırılması məsələləri müzakirə edilmişdir.

Tədbirdə Avropa Birliyini təmsil edən Böyük Britaniya və Şimali İrlandiya Birləşmiş Krallığının Azərbaycandakı səfiri Endrü Taker son illərdə bu mötəbər qurum ilə Azərbaycan arasında əlaqələrin inkişafında ciddi irəliləyişlərin olduğunu qeyd etmiş, Avropa Birliyinin Azərbaycanla əməkdaşlığının daha da genişləndiriləcəyinə ümidvar olduğunu bildirmişdir.

Fransanın Azərbaycandakı səfiri xanım Şantal Puare, Yunanıstanın səfiri Merkurios Karafotias, İtaliyanın səfiri xanım Margerita Kosta, BMT-nin Azərbaycandakı rezident-əlaqələndiricisi Marko Borsotti, T A C İ S proqramının nümayəndəsi İ.Sadıqov çıxış edərək, Azərbaycanla iqtisadi əlaqələrin genişləndirilməsinə xüsusi diqqət yetirildiyini qeyd etmiş, bu əlaqələrin inkişafının əhəmiyyətindən danışmışlar.

Tədbirdə iştirak edən Fransanın “TotalFinaElf”, Almaniyanın “Siemens”, Hollandiyanın “Fondel Metal Participation”, Azərbaycanın “Qafqazenerjiservis” və “Azinşaat” şirkətlərinin nümayəndələri iqtisadiyyatın konkret sahələri üzrə əlaqələrin inkişaf perspektivləri, qarşılaşdıqları problemlər barədə fikirlərini bildirmişlər.

Forumda yekun sözü ilə çıxış edən iqtisadi inkişaf naziri F.Əliyev tədbirin keçirilməsinə dəstək verdiyinə görə BMT-nin İnkişaf Proqramına minnətdarlığını bildirmiş, məhsuldar fikir mübadiləsi üçün tədbir iştirakçılarına təşəkkür etmişdir.

İqtisadi İnkişaf Nazirliyinin mətbuat xidməti