CƏMİYYƏT
Ədliyyə Nazirliyində kollegiya iclası keçirilib
Ədliyyə Nazirliyinin mətbuat xidmətindən AZƏRTAC-a bildiriblər ki, iclasda “15 yaşı tamam olmamış Azərbaycan Respublikası vətəndaşının fərdi identifikasiya kartı haqqında” Qanunun tətbiqi ilə bağlı Prezident İlham Əliyevin 2014-cü il 9 sentyabr tarixli fərmanlarından irəli gələn vəzifələrin icrası üzrə tədbirlər müzakirə olunub.
Qeyd edilib ki, son illər biometrik eyniləşdirmə sisteminin qurulması istiqamətində əsaslı işlər görülüb, müvafiq qanunvericilik bazası yaradılıb, vətəndaşların şəxsiyyətini təsdiq edən elektron sənədlərin tətbiqinə başlanılıb, habelə onların fərdi identifikasiya kartı ilə təmin olunması nəzərdə tutulur. Kartda doğum haqqında, eləcə də elektron sağlamlıq kartındakı informasiya, 5 yaşından sonra üzərində fotoşəkil və hər bir şəxslə bağlı fərdi dolğun məlumatlar əks olunacaq. Dövlətimizin başçısının tapşırıqlarına əsasən, bununla əlaqədar Ədliyyə Nazirliyinə yeni vəzifələr həvalə olunub.
Kollegiya iclasında kartın təsviri və strukturu, onun hazırlanması və verilməsinə dair prosedurlar müasir informasiya-kommunikasiya texnologiyaları vasitəsilə əyani nümayiş etdirilib.
İclasda qarşıda duran vəzifələrə, o cümlədən kartda zəruri informasiyanın əks olunması, regional və yerli ədliyyə orqanlarında müvafiq texniki avadanlıqla təchizat və zəruri infrastrukturun yaradılması, proqram təminatının formalaşdırılması, beynəlxalq təcrübənin öyrənilməsi və s. ilə bağlı tapşırıqlar verilib.
Vətəndaş müraciətləri ilə işin vəziyyəti müzakirə olunarkən dövlətimizin başçısının vətəndaş-məmur münasibətlərinin sağlam zəmində qurulması, etik davranış qaydalarına ciddi riayət olunması, korrupsiyaya şərait yaradan hallara yol verilməməsi ilə bağlı tapşırıqları vurğulanıb. Ədliyyə orqanlarında və məhkəmələrdə insanlara layiqli xidmət göstərilməsi, vətəndaşların müraciətlərinə qayğı və həssaslıqla yanaşılması daim diqqətdə saxlanılaraq bu sahədə görülən məqsədyönlü işlər, o cümlədən vətəndaşların qəbulu qaydasının təkmilləşdirildiyi, səyyar qəbulların mütəmadi xarakter daşıdığı, müasir İKT-lərin və elektron xidmətlərin geniş tətbiqi, ərizə və şikayətlərə təxirə salınmadan baxılıb həlli məqsədilə nazirlikdə “Qaynar xətt”lərin yaradıldığı qeyd olunub. Bildirilib ki, “Qaynar xətt”lərə daxil olan şikayətlər təhlil olunaraq nəzarətə götürülür və müvafiq zəruri tədbirlər görülür. Bununla belə iclasda bu sahədə mövcud çatışmazlıqlar müzakirə edilərək vətəndaşların müraciətlərində qaldırılan məsələlərə diqqətlə yanaşılması, onların, o cümlədən “Qaynar xətt” və elektron poçt vasitəsilə daxil olan şikayətlərin çevik həlli, vətəndaşların qəbulu və “Qaynar xətt”in işinin səmərəliliyinin artırılması, kadr potensialının gücləndirilməsi və digər tədbirlər müəyyən edilib.
İclasda, həmçinin ölkəmizdə yuvenal ədliyyənin tətbiqi məsələləri müzakirə olunub. Bildirilib ki, son illər yetkinlik yaşına çatmayan təqsirləndirilən şəxslərin və məhkumların saxlanma şəraiti xeyli yaxşılaşdırılıb, hüquqları genişləndirilib, bu sahədə UNICEF ilə səmərəli əməkdaşlıq aparılır.
Kollegiya iclasında yeniyetmələrin cinayət işləri üzrə ədalət mühakiməsi həyata keçirilərkən hüquqlarının müdafiəsinin gücləndirilməsi, psixoloji aspektlərin nəzərə alınması, yeni yanaşmaların tətbiqi, məhkəmədə belə işlərə baxılması qaydasının müasir İKT-lərin imkanlarından istifadə olunmaqla təkmilləşdirilməsi, yuvenal ədliyyə sahəsində təlimlərin keçirilməsi və s. ilə bağlı tədbirlər müəyyənləşdirilib.
Bununla yanaşı, ədliyyə fəaliyyətini tənzimləyən normativ-hüquqi aktların layihələri müzakirə olunaraq qəbul edilib.
İclasda bir sıra qeyri-kommersiya hüquqi şəxslər dövlət qeydiyyatına alınıb.