“Ailə Akademiyası” layihəsinə start verilib
Bakı, 7 aprel, AZƏRTAC
Müasir dövrdə dünyada baş verən qlobal dəyişikliklər və çağırışlar ailə institutuna nəzərəçarpacaq dərəcədə təsir göstərməkdədir. Bununla əlaqədar olaraq dövlət ailə siyasətinin dəstəklənməsi istiqamətində ailə institutunun təbliği, milli-mənəvi dəyərlərin gənc nəslə aşılanması, eləcə də qadınların cəmiyyətdə fəallığının artırılması məqsədilə yerlərdə özünüidarəetmə orqanlarının imkanlarını nəzərə alaraq, Ailə, Qadın və Uşaq Problemləri üzrə Dövlət Komitəsi bələdiyyə orqanları ilə birgə “Ailə Akademiyası” layihəsinə start verib.
AZƏRTAC xəbər verir ki, aprelin 7-də Binəqədi rayon Yeni Azərbaycan Partiyası binasında Binəqədi Rayon İcra Hakimiyyəti və yerli idarəetmə orqanlarının iştirakı ilə layihənin rayon üzrə açılış tədbiri keçirilib. Əvvəlcə qonaqlar nümayiş olunan sərgiyə baxıblar. Sonra Ailə, Qadın və Uşaq Problemləri üzrə Dövlət Komitəsi və Ədliyyə Nazirliyinin birgə təşkilatçılığı ilə keçirilən tədbir açıq elan edilib.
Komitənin sədr müavini Aynur Sofiyeva çıxış edərək “Ailə Akademiyası” layihəsinin ictimai əsaslarla yaradıldığını və əsas hədəfin gənclər, yeni qurulan ailələr və sosial aktivliyi zəif olanlar olduğunu qeyd edib. Daha sonra A.Sofiyeva bələdiyyələri bu işdə daha fəal olmağa səsləyərək bildirib: “Azərbaycanda 1600-dən çox bələdiyyə var. Bələdiyyələrin aktivliyi sayəsində il ərzində bir milyondan çox insan təbliğat və maarifləndirmə işinə cəlb oluna bilər. Bu layihə əhalinin ölkədə baş verən prosesləri öyrənməsinə, aktuallaşmasına və öz hüquqlarını bilməsinə yardım edəcək. Qarşıda duran ən vacib məsələlərdən biri mənəvi saflığın əldə olunmasıdır. Bu sahədə mütəxəssislərin üzərinə çox böyük öhdəliklər düşür. Qloballaşma ilə özünütəcrid arasında ortaq məxrəcə gəlmək, kənardan olan təsirlərin qarşısının alınması üçün gənclərdə sosial immunitetin yaranmasına dəstək olmaq əsas istiqamətlərdəndir. Fundamental milli-mənəvi, ailə dəyərlərini qoruyub saxlanılması, ona konservativ yanaşaraq gələcək nəsillərə çatdırılmasında yaxından iştirak etmək hər birimizin borcudur.
Layihədə evdar qadınların da müzakirələrə cəlb edilməsi nəzərdə tutulub. Onlara cəmiyyətə faydalı vətəndaş yetişdirmək üçün öhdəlikləri və vəzifələri izah olunmalıdır. Vətənpərvərlik hisslərinin yeni nəslə aşılanması, onların sağlam ruhda böyüdülməsi üçün hər kəsi birgə fəaliyyətə çağırıram.”
Layihəni təqdim edən komitənin nümayəndəsi Azər İsalı onun həyata keçirilməsində əsas məqsədin gənclər, qadınlar, xüsusilə, yeni qurulan ailələr, sosial iştirakçılığı zəif olan insanların aktual mövzular ətrafında sosioloq, psixoloq, hüquqşünas və digər ekspertlərdən faydalı məlumatlar əldə etməsinə və öz fikir və təkliflərini birbaşa çatdırmasına kömək etmək olduğunu qeyd edərək deyib: “Layihə çərçivəsində bələdiyyə orqanlarında yerli sakinlərin iştirakı ilə görüşlərin il ərzində mütəmadi olaraq keçirilməsi nəzərdə tutulub. Bu işdə bələdiyyələrin üzərinə böyük məsuliyyət düşür. Əgər bir ay ərzində 60 nəfər müzakirələrdə iştirak etsə, o zaman bir il içində respublikada hər 9 nəfərdən biri maariflənəcək. Bu, eyni zamanda bələdiyyə orqanlarının yerlərdə nüfuzunun daha da artmasında da faydalı olacaq.
“Ailə Akademiyası” genişmiqyaslı maarifləndirmə layihəsi çərçivəsində görüşlər cəmiyyət üzvləri ilə aktiv dialoq şəklində baş tutacaq. Belə ki, ayın ilk ongünlüyündə sosioloq-psixoloq vasitəsilə məlumatlandırma olacaqsa, ikinci ongünlükdə artıq sağlamlıqla bağlı informasiya veriləcək, üçüncü ongünlükdə isə hüquqşünas məsləhətləri dinləniləcək.”
Daha sonra tədbirdə çıxış edən Ədliyyə Nazirliyinin İnzibati Nəzarət İdarəsinin əməkdaşı Hafiz Əliyev, AMEA-nın professoru, fəlsəfə elmlər doktoru Rəna Mirzəzadə, “Qadınlar bələdiyyələrin inkişafı uğrunda” İctimai Birliyinin sədri Lüdmila Xəlilova, Heydər məscidinin axundu Rüfət Qarayev, Binəqədi Rayon İcra Hakimiyyəti yanında İctimai Şuranın sədri Aslan Mehdiyev, Binəqədi Rayon İcra Hakimiyyəti başçısının müavini Aygün Əliyeva, rayonun fəal gənci Sona Quliyeva layihənin əhəmiyyətindən, müasir gənclərin üzləşdiyi ictimai aktivlik problemlərindən, Azərbaycanda qadın hüquqlarından, onlara verilən dəyərdən, keçmiş və indiki ailədaxili münasibətlərin müqayisəsindən, boşanmalar və səbəblərindən, məişət zorakılıqlarından, düzgün ailə təməlindən danışaraq örnək ailə nümunələrindən bəhs ediblər və bunun ailə dəyərlərini qorumaq və möhkəmləndirmək istiqamətində atılmış mühüm addım olduğunu vurğulayıblar.
Bölmənin digər xəbərləri
