ELM VƏ TƏHSİL
Akademik Zərifə Əliyeva adına Liseydə ürəkaçan nailiyyətlər qazanılır
Bakı, 1 avqust, İbrahim Əsədov, AZƏRTAC
Akademik Zərifə Əliyeva adına Lisey ölkənin təhsil uğurları ilə seçilən məktəblərindəndir. Təhsilin inkişafı üçün burada səmərəli tədbirlər həyata keçirilir, layihələr reallaşdırılır. Məktəbin direktoru, filologiya üzrə fəlsəfə doktoru, əməkdar müəllim Mehriban Vəliyeva AZƏRTAC-a müsahibəsində bu barədə danışıb.
-Akademik Zərifə Əliyeva adına Liseyin fəaliyyəti barədə məlumat verməyinizi xahiş edirik.
-Akademik Zərifə Əliyeva adına liseydə 645 şagird təhsil alır. IX-XI sinifləri əhatə edən təhsil ocağı Azərbaycan və rus bölmələrində təmayüllər üzrə fəaliyyət göstərir. Liseydə siniflərin təmayüllər üzrə komplektləşməsi şagirdlərin maraq göstərdikləri fənləri daha dərindən mənimsəmələrinə imkan verir. Tədris ocağında fundamental və tətbiqi elmlərin tədrisi, bilik yarışlarının təşkili, beynəlxalq layihələrdə və olimpiadalarda iştirak prioritet məsələlərdən hesab olunur. Pedaqoji kollektiv şagirdlərdə müstəqil düşünmək, mühakimə yürütmək, nəticə çıxarmaq, tədqiqat aparmaq kimi bacarıq və vərdişlərin formalaşmasını əsas tutur. 2009-cu ildən məktəb Təhsil Nazirliyi tərəfindən həyata keçirilən “Elektron məktəb” pilot layihəsinə qoşulub. Qeyd edək ki, diqqətəlayiq uğurlar qazanılıb. Lisey 2013-2014-cü tədris ilində “Ən yaxşı ümumtəhsil məktəbi” müsabiqəsinin qalibi olub.
Əsas məqsədimiz milli mənəvi dəyərlərə, yaradıcı təfəkkür və məntiqi yanaşmaya malik, cəmiyyətə yararlı, hərtərəfli inkişaf etmiş layiqli vətəndaş, dünyanın qabaqcıl və nüfuzlu ali təhsil müəssisələrində təhsil ala biləcək gənclər yetişdirməkdir.
Liseydə 33 sinif otağı, multimedia və fənn kabinetləri, fizika və kimya laboratoriyaları, dörd kompyuter otağı, kitabxana, yeməkxana, idman zalı fəaliyyət göstərir. Sinif otaqları, laboratoriyalar və idman zalı müasir avadanlıqla təchiz olunub. Bununla yanaşı, liseyin İnformasiya-Resurs Mərkəzi, yeni dərslik, elmi və bədii ədəbiyyatla zəngin kitabxanası vardır.
Liseydə böyük oftalmoloq alim, akademik Zərifə xanım Əliyevanın xatirə salonu yaradılıb. Salonda böyük alimin zəngin həyat və fəaliyyətinin ayrı-ayrı məqamlarını əks etdirən kitab və jurnallar, fotoşəkillər nümayiş olunur.
-Şagirdlərin biliyinin qiymətləndirilməsi necə həyata keçirilir ?
-Liseyə qəbul müsabiqə yolu ilə keçirilir və siniflər təmayüllər üzrə: riyaziyyat-texniki, riyaziyyat-iqtisadiyyat, humanitar və təbiət fənləri üzrə komplektləşdirilir. Şagirdlərin bilik səviyyəsini yoxlamaq üçün kiçik və böyük summativ qiymətləndirmə testləri, mövzu və bölmələr üzrə şifahi sorğu, müxtəlif fənlər üzrə layihə işlərinin müdafiəsi və sinifdən-sinfə keçid imtahanları keçirilir. Qiymətləndirmə 100 ballıq sistemlə aparılır. Birinci və ikinci yarımilin sonunda şagirdlər yekun imtahanı verirlər. Bundan başqa, şagirdlərin bilik səviyyəsini nəzarətdə saxlamaq üçün hər ay Liseydaxili Qiymətləndirmə Testləri (LQT) keçirilir. Testlərə hazırlıq məqsədi ilə xüsusi seminarlar, məsləhət saatları təşkil olunur. LQT-nin nəticələrinə əsasən hər bir sinfin, müəllimin, şagirdin müvəffəqiyyət faizləri hesablanır, reytinq cədvəlləri hazırlanır və yüksək bal toplamış şagirdlər stimullaşdırılır.
-Təhsildə informasiya-kommunikasiya texnologiyalarının tətbiqi çox önəmli məsələdir. Bu sahədə hansı işlər görülür ?
-Liseydə informasiya-kommunikasiya texnologiyaları (İKT) geniş tətbiq edilir, bütün fənn müəllimlərinin və şagirdlərin keyfiyyətli təhsil prosesi üçün hərtərəfli imkanlar yaradılıb. Hazırda liseydə 33 proyektor, 75 stolüstü kompyuter (PC), 27 noutbuk, lisenziyalı proqram təminatı, səkkiz interaktiv qurğu, WI-FI zonası var. yüksəksürətli fiber-optik şəbəkədən müəllim və şagirdlər gündəlik istifadə edirlər. Bu, liseydə elektron jurnalın istifadəsini təmin edib. Liseydə İKT üzrə savadlılığın artırılması məqsədilə mütəmadi treninqlər keçirilir. Şagird və müəllimlər ilboyu dərs prosesində digər məktəblərdə keçirilən tədbirləri veb kameralar vasitəsi ilə izləyirlər. Şagirdlər müəllimlərlə daim onlayn əlaqədədirlər. Liseydə elektron dərslər qurulur, müəllimlərin tapşırıqları elektron poçt vasitəsilə təhlil edilir. Elektron "qaynar xətt" mövcuddur ki, bu da şagirdlərdə fikirlərini müstəqil ifadə etmək imkanı yaradır, rəhbərliyə daxil olan şikayət və təkliflər obyektiv araşdırılır. 2014-cü ildə Koreya- Azərbaycan İKT əsaslı innovativ tədris layihəsi çərçivəsində liseydə İKT əsaslı innovativ tədris otağı yaradılıb. Nəticədə yalnız informatika dərsləri deyil, digər fənlər də İKT-dən geniş istifadə olunmaqla tədris edilir.
-Liseyin nailiyyətləri haqqında nə deyərdiniz ?
-2014-2015-ci tədris ilində fənn olimpiadalarının Bakı şəhər turunda iştirak edən 52 şagirdimizdən 27-si “Bakı turunun qalibi” adına layiq görülüb. Fənn olimpiadaların respublika turunda 11 şagirdimiz qızıl, gümüş, bürünc medallarla təltif olunub. “Sabahın alimləri” IV Respublika müsabiqəsində liseyin şagirdləri böyük uğurlar əldə ediblər. Onlar müxtəlif kateqoriyalar üzrə 15 layihə ilə təmsil olunub və 10 layihə müsabiqədə uğur qazanıb. Birinci yerə layiq görülmüş, fizika-astranomiya kateqoriyası üzrə layihənin qalibləri Mədət və Nigar Sərdarlı bacı-qardaşları bu ilin mayında ABŞ-ın Pensilvaniya ştatının Pitsburq şəhərində keçirilmiş “Elm və mühəndislik” sərgisində respublikamızı təmsil ediblər. Şagirdlərdən Leyla Ələkbərli və Vüsalə Süleymanovanın “İri şəhərlərin yaşıllaşdırılmasının ekoloji modeli” adlı layihəsi 2015-ci il aprelin 29-dan mayın 5-dək Keniyada keçirilmiş beynəlxalq elmi-layihə olimpiadasında gümüş medala layiq görülüb, həmçinin onlar mayın 31-dən iyunun 5-dək Niderlandda keçirilmiş İNESPO layihə olimpiadasının iştirakçısı olublar. İlkin Musayev proqramlaşdırma üzrə bir layihə ilə, Ələkbər Əsgərov, Samir İbrahimzadə və Cəmil Əlizadə robot texnikası üzrə birgə layihələri ilə liseyimizi bu ilin aprelində Çində keçirilmiş beynəlxalq müsabiqədə təmsil ediblər. Eyni zamanda, may ayında İstanbulda keçirilən “MEF” Beynəlxalq Tədqiqat Layihələri yarışmasında liseyimizin şagirdləri Orxan Əhmədov və Tuncay Tağıyev kimya üzrə birgə hazırladıqları layihə ilə iştirak edərək bürünc medal qazanıblar.
Liseydə 2015-2016-cı tədris ilinə geniş hazırlıq işləri aparılır. Yeni tədris ilində nailiyyətlərimizi daha da yüksəltməyə çalışacağıq.