Bakı, 12 iyul, AZƏRTAC

Bu ilin iyununda Əmək və Əhalinin Sosial Müdafiəsi Nazirliyinin Əmək Müqaviləsi Bildirişi üzrə Elektron İnformasiya Sisteminə 279,4 min müraciət qeydə alınıb.

Nazirliyin mətbuat xidmətindən AZƏRTAC-a daxil olan məlumata görə, bu, ötən ilin müvafiq dövrü ilə müqayisədə təqribən iki dəfə çoxdur.

Müraciətlərin 239,3 mini “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi”, 16,8 mini “Əmək müqaviləsi bildirişləri barədə məlumatların işçilər tərəfindən əldə edilməsi”, digərləri isə “İş yerinə dair arayış” elektron xidmətlərinə aid olub.

Əmək Müqaviləsi Bildirişi üzrə Elektron İnformasiya Sistemi əmək münasibətlərinin və həmin münasibətlərdə baş verən dəyişikliklərin elektron qeydiyyatının aparılması yolu ilə rəsmiləşdirilməsi və şəffaflaşdırılmasına xidmət edir. Sistem, həmçinin işçilərə onlarla əlaqədar sistemə daxil edilən bildirişlər barədə məlumat öyrənmək, onlara lazım olan məlumatları elektron sənəd kimi formalaşdırmaq və ya kağız formasında çap edə bilmək imkanı verir. İşçilərin və işəgötürənlərin qanunvericilikdən irəli gələn hüquqlarının əsaslı təminat vasitəsi olan yeni sistem eyni zamanda əmək münasibətlərinin əhatəli uçotunun aparılmasına və həmin sahə ilə əlaqədar real vəziyyəti əks etdirən məlumat bazasının formalaşmasına şərait yaradıb.

Hazırda Əmək Müqaviləsi Bildirişi üzrə Elektron İnformasiya Sistemi dünyada ən mütərəqqi təcrübə nümunələrindən biri kimi qəbul edilərək yüksək dəyərləndirilir. Ötən ay isə sistem BMT-nin ixtisaslaşdırılmış qurumu olan Beynəlxalq Telekommunikasiya İttifaqının “Çempion layihə” mükafatına layiq görülüb.

Əmək Müqaviləsi Bildirişi üzrə Elektron İnformasiya Sistemi 2014-cü ilin iyulundan tətbiq edilməyə başlanılıb və “Elektron hökumət” portalında geniş istifadəçi kontingenti ilə seçilir. Həmin vaxtdan indiyədək informasiya sisteminə 8,8 milyondan çox müraciət qeydə alınıb.