CƏMİYYƏT
Əmək və Əhalinin Sosial Müdafiəsi Nazirliyi tərəfindən 53 min 484 nəfərə Azərbaycan Prezidentinin aylıq təqaüdü ödənilir
Bakı, 4 avqust, AZƏRTAC
Azərbaycan Respublikası Prezidentinin müvafiq Fərman və Sərəncamlarına əsasən, Əmək və Əhalinin Sosial Müdafiəsi Nazirliyi tərəfindən Prezident təqaüdü ilə təmin olunan vətəndaşların sayı cari ilin yanvar-iyun aylarında 53484 nəfər təşkil edib.
Nazirlikdən AZƏRTAC-a bildiriblər ki, Azərbaycanın Milli Qəhrəmanı fəxri adı verilmiş 180 nəfərə və ya ailə üzvlərinə, 13 min 402 şəhid ailəsinə, 18 min 784 nəfər müharibə əlili və onlara bərabər tutulan şəxsə, 20 Yanvar faciəsi zamanı şəhid olmuş 116 nəfərin ailəsinə, 20 Yanvar hadisələri ilə əlaqədar əlil olan 320 nəfərə Prezidentin aylıq təqaüdü ödənilib. Həmçinin Azərbaycan Respublikasının fəxri adları ilə təltif olunan 2240 nəfər, Böyük Vətən müharibəsi iştirakçısı olan 494 nəfər, ümumi səbəbdən I qrup əlil olan və əmək pensiyası almaq hüququ olmayan 17 min 480 nəfər Prezidentin aylıq təqaüdü ilə təmin olunub.
Qeyd olunan dövrdə 406 nəfərə Azərbaycan Prezidentinin fərdi təqaüdü ödənilib. Həmçinin Əfqanıstanda sovet qoşunlarının tərkibində beynəlmiləl borcunu yerinə yetirərkən həlak olan, itkin düşmüş və məhkəmə qaydasında ölmüş elan edilən 57 nəfər hərbi qulluqçunun 62 nəfər ailə üzvünə də Prezident təqaüdü təyin olunaraq ödənilməsinə başlanılıb.