CƏMİYYƏT
Əmək və Əhalinin Sosial Müdafiəsi Nazirliyi və KİVDF-in birgə fərdi jurnalist yazıları müsabiqəsinin qalibləri mükafatlandırılmışlar
Mükafat alanlar arasında AzərTAc-ın əməkdaşı da vardır VİDEO
Bakı, 30 iyun (AZƏRTAC, Samirə Allahverdiyeva). Əmək və Əhalinin Sosial Müdafiəsi Nazirliyi (ƏƏSMN) və Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) birgə təşkilatçılığı ilə “Mərkəzi icra hakimiyyəti orqanları ilə kütləvi informasiya vasitələri arasında əməkdaşlığın inkişaf etdirilməsi” mövzusunda konfrans keçirilmişdir.
AZƏRTAC xəbər verir ki, tədbirdə əmək və əhalinin sosial müdafiəsi naziri Səlim Müslümov Prezident İlham Əliyevin nazirlik qarşısında qoyduğu vəzifələrə uyğun olaraq, əmək və sosial müdafiə sistemində aparılan islahatlardan danışmışdır. Qeyd edilmişdir ki, nazirliyin xidmət sektorları geniş əhali təbəqəsini əhatə edir və aparılan islahatlar da xidmət sahələrində müasir iş üsulları əsasında şəffaflığın təmin olunmasına yönəldiyindən daim cəmiyyətin maraq dairəsindədir. Nazir demişdir ki, biz də fəaliyyətimizi buna uyğun quraraq, xidmət qurumlarında aparılan işlər barədə ictimaiyyətin davamlı şəkildə və dolğun məlumatlandırılmasını, bu məqsədlə KİV-lə əməkdaşlığı diqqətdə saxlayırıq.
ƏƏSMN-in və KİVDF-in birgə fərdi jurnalist yazıları müsabiqəsinin də bu baxımdan xüsusi önəm kəsb etdiyini bildirən S.Müslümov müsabiqədə 5 istiqamət üzrə təqdim edilən mövzuların əsasən islahat sahələrinə aid olduğunu vurğulamışdır. Nazir demişdir ki, müsabiqədə əsas məqsəd vətəndaşların əmək və sosial müdafiə hüquqları, bu hüquqların təminatı sahəsində müasir iş üsullarının tətbiqi ilə bağlı aparılan islahatlar barədə KİV vasitəsilə cəmiyyətin daha geniş məlumatlandırılmasıdır. Eyni zamanda, bu müsabiqə nazirliyin fəaliyyət sahələri üzrə aktual məsələlərin medianın gündəminə çıxarılmasına, digər tərəfdən KİV nümayəndələrinin həmin mövzularda biliklərinin, səriştələrinin artırılmasına xidmət edir.
S.Müslümov müsabiqədə uğur qazanmış jurnalistləri təbrik etmiş, onlara, eləcə də müsabiqəyə qatılmış bütün jurnalistlərə yaradıcılıq uğurları arzulamışdır.
KİVDF-in icraçı direktoru Vüqar Səfərli milli mətbuatın inkişaf tarixindən söz açaraq, Prezident İlham Əliyevin diqqət və qayğısı sayəsində KİV-lərin maddi-texniki problemlərinin aradan qaldırılması, jurnalistlərin sosial müdafiəsinin gücləndirilməsi, onların yeni mənzillərlə təmin edilməsi istiqamətində görülən işləri diqqətə çatdırmışdır. V.Səfərli bildirmişdir ki, Prezident İlham Əliyevin Fərmanı ilə yaradılan Kütləvi İnformasiya Vasitələrinin İnkişafına Dövlət Dəstəyi Fondu il ərzində KİV layihələrinin maliyyələşdirilməsi ilə bağlı müsabiqələr elan edir. Həmçinin ayrı-ayrı icra orqanları ilə birlikdə jurnalistlər arasında fərdi yazı müsabiqələri də təşkil olunur.
Sonra V.Səfərli ƏƏSMN-in və KİVDF-in birgə fərdi jurnalist yazıları müsabiqəsinin nəticələri barədə məlumat vermişdir. O bildirmişdir ki, müsabiqədə hər istiqamətə dair 3 mövzu olmaqla, 5 istiqamət üzrə ümumilikdə 15 mövzu təqdim olunmuşdur. Müsabiqəyə təqdim edilən 62 yazı ƏƏSMN-in mütəxəssisləri tərəfindən obyektiv surətdə qiymətləndirilmişdir. Beləliklə, müsabiqənin nəticələrinə uyğun olaraq, 5 istiqamətin hər biri üzrə I-II-III yerləri tutmuş 15 nəfər qalibə pul mükafatları (I yer - 1000 manat, II yer - 700 manat, III yer - 500 manat) və xüsusi diplomlar, habelə 11 nəfərə həvəsləndirici mükafatlar (200 manat) və təşəkkürnamələr verilməsi qərara alınmışdır.
Tədbir müsabiqə qaliblərinin mükafatlandırılması, habelə həvəsləndirici mükafatların təqdim olunması ilə davam etmişdir.
Mükafat alanlar arasında AZƏRTAC-ın müxbiri Samirə Allahverdiyeva da vardır. O, bu mükafata “Sosial təminat və sosial xidmətlər sisteminə baxış” istiqaməti üzrə hazırladığı yazıya görə layiq görülmüşdür.
Daha sonra konfransda ƏƏSMN və KİV arasında qarşılıqlı əməkdaşlığa dair fikir mübadilələri aparılmışdır.