CƏMİYYƏT
“Əsgərə məktublar” mövzusunda yazı müsabiqəsinin qalibləri mükafatlandırılıb
Bakı, 12 fevral, Məhərrəm Əlioğlu, AZƏRTAC
Səfərbərlik və Hərbi Xidmətə Çağırış üzrə Dövlət Xidmətinin vətənpərvərlik ruhunun yüksəldilməsi məqsədilə kütləvi informasiya vasitələri nümayəndələri arasında elan etdiyi “Əsgərə məktublar” mövzusunda yazı müsabiqəsinin qalibləri mükafatlandırılıb.
AZƏRTAC xəbər verir ki, fevralın 12-də bu münasibətlə 3 saylı “ASAN xidmət” mərkəzində keçirilən mərasimdə Vətənimizin azadlığı və ərazi bütövlüyü uğrunda canlarından keçən şəhidlərimizin xatirəsi bir dəqiqəlik sükutla yad edilib, dövlət himni səsləndirilib.
Səfərbərlik və Hərbi Xidmətə Çağırış üzrə Dövlət Xidməti rəisinin birinci müavini, general-mayor Zaur Abdullayev çıxış edərək bildirib ki, gənclərin vətənpərvərlik tərbiyəsinin yüksəldilməsi və bu istiqamətdə təbliğatın aparılması xidmətin qarşısına qoyulan mühüm vəzifələrdəndir. Bu gün təşkil olunan tədbir bu istiqamətdə aparılan işlərin və geniş fəaliyyət planımızın tərkib hissəsidir. Artıq ikinci ildir ki, xidmət tərəfindən “Vətənin müdafiəsinə hazıram!” adı altında regionlarda hərbi vətənpərvərlik tədbirləri keçirilir. Həyata keçirilən tədbirlərdə məqsəd vətəndaşların Silahlı Qüvvələrə olan inamını daha da yüksəltmək, vətənpərvərlik tərbiyəsini gücləndirməkdir.
Z.Abdullayev deyib ki, mətbuatın vətənpərvərlik mövzusunun təbliğindəki rolunu xüsusi qeyd etməliyik. Elə bu səbəbdən də xidmət mətbuat nümayəndələri ilə birgə tədbirlər həyata keçirir, medianın vətənpərvərlik təbliğatı işindən istifadə etməyə çalışır. “Əsgərə məktublar” mövzusunda yazı müsabiqəsi də birgə fəaliyyətimizin yeni istiqamətidir. Müsabiqəni elan etməkdə məqsədimiz jurnalistlərin bu işləri qələmə almasına nail olmaq və ictimaiyyətin diqqətini ordu, əsgər mövzusuna yönəltmək idi. Müsabiqəyə təqdim olunan yazılarda çox dəyərli fikirlərin, gənc nəslə vətənpərvərlik dolu çağırışların şahidi olduq.
O, qalibləri təbrik edib, onlara uğurlar arzulayıb.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ülvi Mehdiyev gənclərin hərbi-vətənpərvərlik tərbiyəsində belə müsabiqələrin əhəmiyyətini yüksək qiymətləndirib. Bildirib ki, Dövlət Agentliyi Səfərbərlik və Hərbi Xidmətə Çağırış üzrə Dövlət Xidməti ilə hərbi vətənpərvərlik mövzularında birgə tədbirləri davam etdirəcək. Bu cür layihələri genişləndirmək lazımdır.
Qalibləri təbrik edən Azərbaycan Respublikasının Prezidenti yanında Gənclər Fondunun icraçı direktoru Fərhad Hacıyev isə qeyd edib ki, fond tərəfindən dəstəklənən layihələrin 30-40 faizi vətənpərvərlik mövzularını əhatə edir.
Bildirilib ki, müsabiqəyə ötən il dekabrın 7-dən 2016-cı il yanvarın 18-dək qəzet, jurnal və informasiya agentliklərində, həmçinin xəbər saytlarında dərc olunan yazılar buraxılıb. Müsabiqəyə 50-dək jurnalist yazı təqdim edib. Onlardan 13-ü mükafata layiq görülüb.
Müsabiqəyə təqdim olunan yazılar təbliğat, maarifləndirmə, çap məqsədilə Xidmətin nəşrlərində istifadə ediləcək.
Qaliblər pul mükafatı və Səfərbərlik və Hərbi Xidmətə Çağırış üzrə Dövlət Xidmətinin diplomları ilə təltif olunublar.
Mükafat alanlar arasında AZƏRTAC-ın əməkdaşı da var.
Tədbirdə, həmçinin müsabiqəyə təqdim olunmuş yazıların çap edildiyi kitabçanın təqdimatı da keçirilib.