REGİONLAR
“Astaraçay” MMC beynəlxalq sertifikatlara layiq görülüb
Astara, 12 fevral, Bağır Əliyev, AZƏRTAC
“Astaraçay” MMC-nin ISO standartları üzrə beynəlxalq sertifikatlara layiq görülməsi münasibətilə fevralın 12-də çay emalı fabrikində mərasim keçirilib.
AZƏRTAC xəbər verir ki, tədbir iştirakçıları əvvəlcə “Astaraçay” MMC-yə məxsus çay fabriki, muzey və çəltik sahələrinə baş çəkiblər.
Qonaqlara Azərbaycanda kənd təsərrüfatının ənənəvi sahələrindən olan çayçılığın inkişaf tarixi, ulu öndər Heydər Əliyevin rəhbərliyi ilə ölkənin cənub bölgəsində bu istiqamətdə həyata keçirilmiş tədbirlər barədə məlumat verilib.
Qeyd olunub ki, respublikamızda çayçılığın inkişafında daim mühüm rol oynamış Astara əməkçiləri bu gün də bu strateji sahənin zəngin ənənələrini davam etdirirlər.
“Astaraçay” kənd təsərrüfatı müəssisəsi 2010-cu ildə yaradılıb. Kənd təsərrüfatının müxtəlif sahələri, ən əsası isə çayçılıqla məşğul olur. Ümumi əkin sahəsi 640 hektardır. Hazırda təsərrüfatda 400 hektara yaxın çay plantasiyası mövcuddur. Ötən il çay sahələrində nümunəvi yığım aparılaraq 177 ton yaşıl çay yarpağı yığılıb emal edilib. Sahələrdə müasir suvarma şəbəkəsi qurulub. Əkilən “Kolxida” çay toxumları Gürcüstanın Batumi şəhərinin Çayçılıq Elmi-Tədqiqat İnstitutunun tədris-təcrübə sahəsindən gətirilib və yerli şəraitə uyğunlaşdırılıb.
Bildirilib ki, müəssisə əsasən çayçılıq üzrə ixtisaslaşsa da, Azərbaycanda kənd təsərrüfatının qədim sahələrindən olan çəltikçiliklə də məşğul olur. Ötən il ilk dəfə olaraq 100 hektar sahədə səpmə üsulu ilə çəltik əkilib. Əkini Türkiyənin Ədirnə şəhərinin Kənd Təsərrüfatı Elmi-Tədqiqat İnstitutunun çəltikçilik bölməsinin elmi işçiləri azərbaycanlı mütəxəssislərlə birgə həyata keçiriblər. Yerli “Haşımi” sortu ilə yanaşı, İtaliyadan gətirilmiş məhsuldar sortlardan da istifadə edilib. Çəltik sahələrindən 366 ton məhsul toplanıb.
Bu il 120 hektara yaxın sahənin əkinə hazırlanması planlaşdırılır. Bunun üçün xüsusi texnika da alınıb. Eyni zamanda, gündəlik istehsal gücü 10 ton olan və 3 qurutma aqreqatı ilə təchiz olunmuş düyü dəyirmanı əsaslı təmir edilərək istismara verilib.
“Astaraçay” MMC-nin inşa etdiyi çay fabrikinin ərazisi və istehsal prosesi ilə tanışlıq zamanı məlumat verilib ki, fabrik Koreya Respublikası, Yaponiya və Almaniya şirkətlərinin layihəsi əsasında tikilib. 5 hektar əraziyə malik çay fabrikinin istehsal gücü gün ərzində 12 tondur. Gələcəkdə gündəlik çay istehsalını 48 tona çatdırmaq nəzərdə tutulub.
Bildirilib ki, müasir standartlar səviyyəsində qurulmuş çəkici-bükücü müəssisədə çəkisi 100, 200, 250, 300, 400, 500 və 1000 qram olan çay bükümləri hazırlanır. Burada dəqiqədə 8 çay bükümünün istehsalı mümkündür.
Mərasim iştirakçıları MMC-nin ofis binası, “Çay muzeyi”, dequstasiya zalı və “Çay evi” ilə də tanış olublar.
SOCAR-ın nümayəndələrinin, iş adamlarının, KİV təmsilçilərinin iştirak etdiyi tədbirdə çıxış edən “Astara çay” MMC-nin direktoru Tələt Məmmədov bildirib ki, bu gün müəssisənin həyatında əlamətdar günlərdən biridir. “Astara çay” MMC Beynəlxalq Standartlaşma Təşkilatının (ISO) standartları üzrə beynəlxalq sertifikatlara layiq görülüb.
Qeyd olunub ki, 2003-cü il iyunun 1-dən ölkəmiz dünyanın nüfuzlu təşkilatlarından biri olan Beynəlxalq Standartlaşma Təşkilatının (ISO) tam hüquqlu üzvü seçilib. Azərbaycanın ISO-ya üzv qəbul olunması dünyanın inkişaf etmiş ölkələrinin milli standartlaşdırma təşkilatları ilə yaxından əməkdaşlıq etməyə, beynəlxalq standartların tətbiqinə və qabaqcıl təcrübənin öyrənilməsinə geniş imkanlar açıb.
Bildirilib ki, Prezident İlham Əliyevin Azərbaycan Respublikasında yerli şirkətlərin beynəlxalq standartlar səviyyəsində fəaliyyət göstərərək, dünya miqyasında özünə layiqli yer tutması haqqında göstərişlərinə əsasən aparılan məqsədyönlü tədbirlər bu gün müsbət nəticələrini verməkdədir.
“Astaraçay” MMC-nin beynəlxalq şirkətə çevrilmək strategiyasının icrası istiqamətində qarşıda duran ən mühüm məsələlərdən biri ISO standartlarının müəssisədə uğurlu tətbiqinə nail olmaq və şirkətin gələcək fəaliyyətini bu standartların tələbləri səviyyəsində qurmaqdır.
Diqqətə çatdırılıb ki, qısa bir zaman ərzində “Astaraçay” MMC-də iş standartların tələbləri səviyyəsində qurulub, lazımi bütün növ sənədləşdirmə aparılıb, daxili audit prosesi həyata keçirilib. Görülən işlərin uyğunluğunu təsdiq etmək üçün Türk Standartlar İnstitutuna (TSE) müraciət olunub.
TSE tərəfindən keçirilən xarici audit zamanı ciddi kənarlaşma aşkar olunmadığı üçün “Astaraçay” MMC layiq olduğu sertifikatları əldə edib.
Mərasimdə çıxış edən Astara Rayon İcra Hakimiyyətinin başçısı Qəzənfər Ağayev, Türk Standartları İnstitutunun Azərbaycan təmsilçisi Səlim bəy Çələbi əlamətdar hadisə münasibətilə “Astaraçay” MMC-nin kollektivini təbrik ediblər.
Çıxışlarda qeyd olunub ki, “Astaraçay” MMC-nin yeni istifadəyə verdiyi çay emalı fabriki son illər Azərbaycan Respublikasının Prezidenti İlham Əliyevin rəhbərliyi ilə ölkəmizdə həyata keçirilən davamlı sosial-iqtisadi inkişafın daha bir bariz nümunəsidir.
Diqqətə çatdırılıb ki, 2015-ci il aprelin 11-də Astara rayonuna növbəti səfəri çərçivəsində çay fabrikində görülən işlərlə tanış olan Prezident İlham Əliyev Azərbaycanda belə gözəl bir müəssisənin yaradılmasını yüksək qiymətləndirib.
Mərasimin sonunda tədbir iştirakçıları şirniyyat stolu ətrafında ətirli Astara çayının dadına baxıblar.