SİYASƏT


Azərbaycan-İordaniya parlamentlərarası əlaqələri müzakirə olunub

Bakı, 8 fevral, AZƏRTAC

Azərbaycanın İordaniyadakı səfiri Sabir Ağabəyov fevralın 8-də bu ölkənin Parlamentinin Aşağı (Nümayəndələr) Palatasının sədri Atif ət-Taravne ilə görüşüb.

Səfirlikdən AZƏRTAC-a verilən məlumata görə, əvvəlcə səfir Azərbaycan Respublikası Milli Məclisinin sədri Oqtay Əsədov tərəfindən İordaniya Parlamentinin Nümayəndələr Palatasının sədrinə ünvanlanan dəvət məktubunu ona təqdim edib.

Atif ət-Taravne dəvətə görə minnətdarlığını ifadə edib və cari ilin mayında Bakıya səfər etməyə hazır olduğunu bildirib.

Görüşdə ölkələrimiz arasında əlaqələrin səviyyəsindən məmnunluq ifadə edilib, parlamentlərarası münasibətlərin daha da dərinləşdirilməsində qarşılıqlı səfərlərin əhəmiyyəti qeyd olunub. Hər iki ölkənin qaçqın problemi ilə qarşılaşdığı vurğulanıb, bu problemin həlli istiqamətində Azərbaycanda və İordaniyada görülən işlər barədə fikir mübadiləsi aparılıb.

Səfir S.Ağabəyov Ermənistan-Azərbaycan, Dağlıq Qarabağ münaqişəsi ilə bağlı son vəziyyət, Ermənistanın bölgədə davam edən təxribatları, Azərbaycan Ordusunun uğurlu aprel əməliyyatları və həmin döyüşlər nəticəsində düşməndən azad edilən ərazilərdə yenidənqurma işlərinə başlanılması barədə məlumat verib.

Diplomat 25 il əvvəl Ermənistan silahlı qüvvələri tərəfindən Xocalıda azərbaycanlılara qarşı törədilən soyqırımı cinayətindən söhbət açıb, respublikamızın hazırda bu qanlı cinayətin ildönümünə hazırlaşdığı və yaxın günlərdə Əmmandakı səfirliyimizdə də Xocalı soyqırımı qurbanlarının anım mərasiminin keçiriləcəyi qeyd edilib.

İordaniya Senatının Xocalı soyqırımını tanınması, eyni zamanda, qətiyyətlə pislənməsi barədə sənəd qəbul etdiyini məmnunluqla vurğulayan səfir S.Ağabəyov bu addımın Azərbaycan xalqı və hökuməti tərəfindən yüksək qiymətləndirildiyini bildirib. Xocalı soyqırımının 25-ci ildönümü ilə bağlı səfirliyin bəyanatını spiker Atif ət-Taravneyə təqdim edib.

Azərbaycan Respublikasının Prezidenti İlham Əliyevin Sərəncamı ilə 2017-ci ilin ölkəmizdə “İslam Həmrəyliyi İli” elan edildiyini bildirən səfir cari ilin mayın 12-dən 22-dək Bakıda keçiriləcək İslam Həmrəyliyi Oyunları barədə də sədrə məlumat verib.

Atif ət-Taravne ölkələrimiz arasında möhkəm dostluq və əməkdaşlıq əlaqələrinin olduğunu, bu əlaqələrin Kral II Abdullah ilə Prezident İlham Əliyev arasında olan şəxsi dostluq münasibətlərindən bəhrələndiyini bildirib. Ermənistan-Azərbaycan, Dağlıq Qarabağ münaqişəsi və Xocalı soyqırımı ilə bağlı ölkəsinin birmənalı mövqeyinin heç bir zaman dəyişməyəcəyini vurğulayıb.

Sonda sədrə Azərbaycan, ölkəmizin tarixi, mədəniyyəti, xalçaları, habelə Dağlıq Qarabağ münaqişəsi və Xocalı soyqırımı haqqında ərəb dilində nəşr olunan kitab və jurnallar, disklər təqdim olunub.

Görüşdə ölkəmizin İordaniyadakı səfirliyinin müşaviri İ.Əliyev iştirak edib.

© Materiallardan istifadə edərkən hiperlinklə istinad olunmalıdır

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.