ELM VƏ TƏHSİL
Azərbaycan Milli Elmlər Akademiyası rəyasət heyətinin növbəti iclası keçirilib
Bakı, 19 oktyabr, AZƏRTAC
Oktyabrın 19-da Azərbaycan Milli Elmlər Akademiyası (AMEA) rəyasət heyətinin növbəti iclası keçirilib.
Akademiyadan AZƏRTAC-a bildirilib ki, əvvəlcə AMEA-nın prezidenti, akademik Akif Əlizadə gündəlikdəki məsələlər barədə məlumat verib.
Tədbirdə AMEA-nın Kimya Elmləri Bölməsinin akademik-katibi, akademik Dilqəm Tağıyevin “AMEA-nın Kimya Elmləri Bölməsinin institutlarında aparılan tədqiqatların vəziyyəti və inkişaf perspektivləri” mövzusunda məruzəsi dinlənilib. Bildirilib ki, bölmənin institutları 2003-2015-ci illərdə kimya elminin neft kimyası, qeyri-üzvi kimya, kimyəvi kinetika və kataliz, kimya mühəndisliyi və kimya texnologiyasının nəzəri problemləri, yüksək molekullu birləşmələr və üzvi kimya sahələri üzrə bir çox elmi və tətbiqi əhəmiyyətli nəticələr əldə ediblər. Son beş ildə kimya institutları Azərbaycan Respublikasının Prezidenti yanında Elmin İnkişafı Fondunun, SOCAR-ın və beynəlxalq qurumların qrant müsabiqələrinin qalibi olublar. Bundan başqa, impakt faktorlu jurnallarda çap olunmuş məqalələrin və onlara edilən istinadların sayı da ildən-ilə artmaqdadır.
Məruzəçi qlobal iqtisadi böhranın təsiri və postneft dövrünün başlanması ilə əlaqədar 2025-ci il və sonrakı illər üçün kimya elminin sürətli və ciddi inkişafına əsas olacaq perspektiv istiqamətləri də sadalayıb.
Məruzə dinlənildikdən sonra rəyasət heyətində müzakirə olunub. Qəbul edilmiş qərarla bölməyə daxil olan institutların rəhbərlərinə müvafiq tapşırıqlar verilib.
Müzakirəyə çıxarılan növbəti məsələ AMEA-nın magistraturasına 2017/2018-ci tədris ili üçün qəbul planı haqqında olub. Məsələ ilə bağlı çıxış edən akademik Akif Əlizadə 2016/2017-ci tədris ili üçün AMEA-nın magistraturasına 19 ixtisas üzrə 56 nəfərin qəbul olunduğunu deyib. Qəbulun nəticələri ilə bağlı məlumat verən AMEA-nın rəhbəri magistraturaya qəbulun uğurla keçdiyini və ali təhsilin bu pilləsinə marağın çox böyük olduğunu qeyd edib. Bildirilib ki, bunu nəzərə alaraq, AMEA-nın elmi bölmə və müəssisələrinin təklifləri əsasında akademiyanın magistraturasına 2017/2018-ci tədris ili üçün qəbul planının layihəsi hazırlanıb.
Rəyasət heyəti planın layihəsini müzakirə edərək təsdiqləyib. Elm və Təhsil İdarəsinə planın İqtisadiyyat Nazirliyində də təsdiq olunması üçün bu quruma təqdim edilməsi tapşırılıb.
AMEA-nın vitse-prezidenti, akademik İbrahim Quliyev xarici ezamiyyətlərin nəticələri haqqında qısa məlumat verib.
Daha sonra AMEA-nın elmi müəssisələrində 2016-cı ildə aparılmış elmi tədqiqat işlərinin yekunlarına dair hesabatlarla bağlı məsələ müzakirə olunub. Bununla bağlı çıxış edən AMEA-nın akademik-katibi, akademik Rasim Əliquliyev institutların elmi və elmi-təşkilati fəaliyyətləri haqqında hesabatlarının təlimata uyğun hazırlanmasına dair tövsiyələrini verib. İclasda akademiyanın elmi müəssisələrində və ali məktəblərdə 2016-cı ildə aparılan elmi tədqiqat işlərinin yekunlarına dair hesabatların vaxtında müzakirə olunub təsdiqlənməsini təmin etmək məqsədilə qərar qəbul olunub.
Sonra akademik R.Əliquliyev Gürcüstana ezamiyyətinin nəticəsi barədə məlumat verib.
Rəyasət heyətinin digər qərarı ilə Biologiya və Tibb Elmləri Bölməsinin akademik-katibinin müavinləri və büro üzvlüyünə seçkilərin nəticələri təsdiqlənib.
Tədbirdə AMEA-nın İqtisadiyyat İnstitutunun strukturunda dəyişiklik edilməsi haqqında da rəyasət heyəti qərar qəbul edib. İnstitutun analitik informasiya və nəşriyyat şöbəsi ləğv edilərək, onun əvəzinə, təhsil şöbəsi və iqtisadiyyatın dövlət tənzimlənməsinin metodoloji və ekonometrik problemləri şöbəsi yaradılıb.
İclasda bir sıra kadr məsələlərinə də baxılıb.