CƏMİYYƏT
Azərbaycan dövləti ulu öndər Heydər Əliyevin xalqımıza əmanətidir
Bakı, 9 dekabr, AZƏRTAC
Dekabrın 9-da Daxili İşlər Nazirliyinin (DİN) Əlahiddə Çevik Polis Alayında xalqımızın ümummilli lideri, müasir müstəqil Azərbaycan dövlətinin memarı və qurucusu, görkəmli dövlət xadimi Heydər Əliyevin anım günü ilə əlaqədar tədbir keçirilib.
DİN-nin mətbuat xidmətindən AZƏRTAC-a bildiriblər ki, əvvəlcə xalqımızın ümummilli lideri Heydər Əliyevin xatirəsi bir dəqiqəlik sükutla yad edilib.
Alay komandiri, polis general-mayoru Zaur Abdullayev ulu öndər Heydər Əliyevin müasir Azərbaycan dövlətinin qurulmasında müstəsna xidmətlərindən söz açıb. Bildirib ki, Ümummilli Lider xalqın ardıcıl çağırışları və iradəsi ilə Azərbaycanın yenidən bərpa olunan müstəqilliyinin böyük təhlükə ilə üz-üzə qaldığı dövrdə böyük siyasətə qayıdıb. Dahi rəhbərin siyasi zəkası və sarsılmaz qətiyyəti sayəsində ölkəmiz parçalanmaqdan, xaosdan, vətəndaş müharibəsi təhlükəsindən qurtulub. Müasir müstəqil Azərbaycan dövlətinin memarı olan ulu öndər Heydər Əliyev ölkənin iqtisadiyyatını dirçəldib, onun gələcək yüksəlişini təmin edəcək neft müqavilələrinin bağlanmasına nail olub. Eyni zamanda, Azərbaycanın balanslaşdırılmış xarici siyasətinin təməlini qurub, ölkəmizin beynəlxalq nüfuzunun artmasını təmin edib. Müasir, güclü, tərəqqi edən Azərbaycan dövləti Heydər Əliyevin şah əsəridir.
Bakı Dövlət Universitetinin tarix fakültəsinin professoru Nuru Məmmədov qeyd edib ki, ümummilli lider Heydər Əliyevin mənalı ömrü xalqa xidmət, Vətənə məhəbbət nümunəsidir. Ulu Öndər Azərbaycan dövlətçiliyinin siyasi-ideoloji əsaslarını və milli inkişaf konsepsiyasını yaradıb. Bu konsepsiya əsasında xalqımız öz həqiqi dövlət müstəqilliyinə qovuşub. Ümummilli Liderin hələ SSRİ dövründə cəsarətlə və uzaqgörənliklə həyata keçirdiyi bu tədbirlər Azərbaycanın gələcək müstəqilliyinin və xalqımızın firavan həyatının möhkəm təməlini qoyub. Ötən əsrin 90-cı illərində xalqımızın böyük oğlunun siyasi arenadan uzaqlaşması ilə Azərbaycanın ağır və çətinliklərlə dolu dövrü başlayıb.
N.Məmmədov deyib ki, 1993-cü il iyunun 15-də Ümummilli Liderin respublikamızda ali hakimiyyətə qayıdışı müstəqil Azərbaycanın dövlətçilik tarixinin şanlı səhifəsini təşkil edir. Bu qayıdışla xalqımız müstəqil dövlətçiliyini itirmək təhlükəsindən xilas olub.
Professor N.Məmmədov diqqətə çatdırıb ki, ölkəmizin tarixinə sabitlik və inkişaf dövrü kimi daxil olan 1993-2003-cü illər ərzində Heydər Əliyev tərəfindən müstəqil dövlətçiliyimizin ideoloji əsasları yaradılıb, azərbaycançılıq məfkurəsi formalaşdırılıb, bazar iqtisadiyyatı prinsiplərinə əsaslanan yeni iqtisadi münasibətlər bərqərar olub. Azərbaycan Respublikasının yeni Konstitusiyasının qəbul olunması ilə hüquqi dövlət quruculuğu yolunda inamlı addımlar atılıb, demokratik və ümumbəşəri dəyərlərə əsaslanan vətəndaş cəmiyyətinin qurulması istiqamətində böyük işlər görülüb.
Vurğulanıb ki, görkəmli dövlət xadiminin müəyyənləşdirdiyi inkişaf xətti hazırda dövlətimizin başçısı İlham Əliyev tərəfindən uğurla davam etdirilir. Azərbaycan öz güclü iqtisadiyyatı və daha da artan beynəlxalq nüfuzu ilə dünya dövlətləri sırasında önəmli yer tutur.
Sonda dahi şəxsiyyət Heydər Əliyevin həyat və siyasi fəaliyyətinə həsr edilmiş sənədli film nümayiş olunub.